დღეს აქ ვარ, რათა შევახსენო რუსეთის მთავრობას, რომ მსოფლიოს არ დავიწყებია ეს მოვლენები

დღეს აქ ვარ, რათა შევახსენო რუსეთის მთავრობას, რომ მსოფლიოს არ დავიწყებია ეს მოვლენები - ვეს მიტჩელი საოკუპაციო ხაზთან

პოლიტიკა - 11:01, 01 May, 2018

1255

ევროპულ და ევრაზიულ საკითხებში ამერიკის სახელმწიფო მდივნის მოადგილე ვეს მიტჩელი საოკუპაციო ხაზის მიმდებარედ არსებულ სოფელ ოძისში საქართველოს საგარეო საქმეთა მინისტრ მიხეილ ჯანელიძესთან ერთად იმყოფებოდა.

მისი თქმით, აშშ არ აღიარებს გამყოფ ხაზს, როგორც საერთაშორისო საზღვარს. მისი მისვლა საოკუპაციო ხაზთან, არის იმის შეხსენება რუსეთისთვის, რომ მსოფლიოს არ დავიწყებია 2008 წლის მოვლენები.

მიტჩელმა კიდევ ერთხელ გამოთქვა საქართველოს სუვერენიტეტისა და ტერიტორიული მთლიანობისადმი მხარდაჭერა და მოუწოდა რუსეთს, შეასრულოს 2008 წლის ბუქარესტის შეთანხმება. მიტჩელის თქმით, რუსეთმა უკან უნდა წაიღოს ოკუპირებული რეგიონების დამოუკიდებლობის აღიარება.

„ათი წლის წინ აქ იყო ომი და დღეს აქ ვარ, რათა შევახსენო რუსეთის მთავრობას, რომ მსოფლიოს არ დავიწყებია ეს მოვლენები. ჩვენ არ ვაღიარებთ ამ გამყოფ ხაზს, როგორც საერთაშორისო საზღვარს. ძალიან გვაღელვებს იმ ქართველების უსაფრთხოების მდგომარეობა, რომლებიც ცხოვრობენ აქ, ამ ხაზის მიღმა. ვგმობთ ნებისმიერ იმ ქმედებას, რაც ეხებოდა საქართველოს მოქალაქეების დაკავებას, წამებას, მკვლელობას და ვუსამძიმრებთ ამ ადამიანების ოჯახებს. ჩვენ მოვუწოდებთ რუსეთის ხელისუფლებას, შეასრულოს 2008 წლის ცეცხლის შეწყვეტის შეთანხმებით ნაკისრი ვალდებულებები, წაიღოს უკან ამ რეგიონების აღიარება და ხელი შეუწყოს ჰუმანიტარულ მიმოსვლას აღნიშნულ რეგიონებში. შეერთებული შტატები არის ერთგული საქართველოს და მისი უსაფრთხოების. ჩვენ ძალიან ვაფასებთ იმ ძალისხმევას, რომელიც მოდის საქართველოს მთავრობისგან, პარლამენტისგან და ხალხისგან, რომ აჩვენონ ერთგულება დემოკრატიული რეფორმებისადმი და საქართველო იყოს წარმატებული, დემოკრატიული ქვეყანა.“ – განაცხადა მიტჩელმა.