"სამშობლოს ერთგულ შვილებზე, ჩვენს ჯარისკაცებზე ზრუნვა სახელმწიფოს უმთავრესი ვალდებულებაა"

"სამშობლოს ერთგულ შვილებზე, ჩვენს ჯარისკაცებზე ზრუნვა სახელმწიფოს უმთავრესი ვალდებულებაა" - პრემიერი

პოლიტიკა - 12:17, 30 Apr, 2018

931

საქართველოს პრემიერ-მინისტრმა გიორგი კვირიკაშვილმა საქართველოს შეიარაღებული ძალების მთელ პირად შემადგენლობას, ყველა ჯარისკაცს და მეთაურს საქართველოს შეიარაღებული ძალების დღე მიულოცა.

ვაზიანში, IV მექანიზებულ ბრიგადაში სიტყვით გამოსვლისას გიორგი კვირიკაშვილმა მადლობა გადაუხადა ყველას, საქართველოს შეიარაღებული ძალების თითოეულ სამხედრო მოსამსახურეს.

„27 წლის წინ, დღევანდელ დღეს, დამოუკიდებელმა საქართველომ თავისი პირველი ჯარისკაცები გაიწვია შეიარაღებულ ძალებში. ქართულმა ჯარმა სწორედ ამ დღიდან გააგრძელა ის ტრადიცია, რომელსაც 1918 წელს, პირველი დამოუკიდებელი რესპუბლიკის პირობებში ჩაეყარა საფუძველი. მაშინ ეს იყო ქართული ჯარის ხანმოკლე, თუმცა გმირული ისტორია, რომლითაც დღესაც ვამაყობთ. ისევე, როგორც 100 წლის წინ, ქართველ ჯარისკაცებს ქვეყნის ერთიანობისთვის არაერთი ბრძოლის გადატანა მოუწიათ. სამშობლოს ერთგულება და მისთვის თავგანწირვა იყო ყოველთვის ის, რაც ჩვენს ჯარისკაცებს გმირებად აქცევდა. პატივი მინდა მივაგო საქართველოს მთლიანობისათვის დაღუპული ჯარისკაცების ხსოვნას.

მინდა მადლობა გადაგიხადოთ ყველას, საქართველოს შეიარაღებული ძალების თითოეულ სამხედრო მოსამსახურეს, ვინც პირნათლად იცავთ ჩვენი ქვეყნის დამოუკიდებლობას, სუვერენიტეტსა და ტერიტორიულ მთლიანობას. თქვენ ქართველი მებრძოლის მტკიცე და გაუტეხელი სულით ერთგულად ემსახურებით და საკუთარი სიცოცხლის ფასად იცავთ ჩვენს სამშობლოს, ჩვენი ქვეყნის სახელმწიფოებრივ ინტერესებს" - განაცხადა პრემიერმა.

გიორგი კვირიკაშვილის თქმით, მთავრობა თავის მხრივ, ძალისხმევას არ იშურებს, რომ ჩვენს სამხედროებს შეუქმნას ღირსეული პირობები.

„სამშობლოს ერთგულ შვილებზე, ჩვენს ჯარისკაცებზე ზრუნვა სახელმწიფოს უმთავრესი ვალდებულებაა. კიდევ ერთხელ გილოცავთ ყველას დღევანდელ დღეს! საქართველოს თითოეულ ჯარისკაცს პირველ რიგში მშვიდობას გისურვებთ; დარწმუნებული ვარ, ჩვენი საქართველო აუცილებლად იქნება მთლიანი, ძლიერი და განვითარებული სახელმწიფო"- განაცხადა გიორგი კვირიკაშვილმა.