საქართველოს პროგრესი იქნება აღიარებული და ვიპოვით გზებს, ზუსტად რა ფორმით ავსახოთ ეს პროგრესი

საქართველოს პროგრესი იქნება აღიარებული და ვიპოვით გზებს, ზუსტად რა ფორმით ავსახოთ ეს პროგრესი - სტოლტენბერგი

პოლიტიკა - 10:59, 28 Apr, 2018

1065

ჩრდილო ატლანტიკური ალიანსის გენერალური მდივნის იენს სტოლტენბერგის თქმით, საქართველომ იმის დასამტკიცებლად, რომ იმსახურებს ალიანსის წევრობას უნდა გააგრძელოს რეფორმები, შეიარაღებული ძალების მოდერნიზება, დააკმაყოფილოს ნატო-ს სტანდარტები, განამტკიცოს კანონის უზენაესობის დაცვა, უზრუნველყოს დამოუკიდებელი მართლმსაჯულება, ებრძოლოს კორუფციას. როგორც სტოლტენბერგმა განაცხადა, აღნიშნული რეფორმები საქართველოს ჩრდილოატლანტიკურ ალიანსში გაწევრიანების გზაზე დაეხმარება.

„საქართველოს ყველა პრაქტიკული მექანიზმი აქვს ნატო-ს წევრობისთვის მოსამზადებლად. წევრობის სამოქმედო გეგმა არის პროცესის შემადგენელი ნაწილი, საქართველოს გაწევრიანების პროცესის ნაწილი. სანამ საქართველო ნატო-ში გაწევრიანდება, მანამდე უნდა იყოს ალიანსის წევრების კონსენსუსი MAP-ზე. ჩვენ არ მიგვიღია საბოლოო გადაწყვეტილება ფორმატების შესახებ. ორგანიზაციის ყველა წევრმა მტკიცე მხარდაჭერა დააფიქსირა საქართველოს მიმართ და საქართველოს მისწრაფების მიმართ. ჩვენ გავაგრძელებთ საქართველოსთვის პრაქტიკული და პოლიტიკური დახმარების აღმოჩენას. წევრებმა მადლიერებით აღნიშნეს საქართველოს მონაწილეობა ნატო-ს მიერ წარმოებულ ოპერაციებში.

დარწმუნებული ვარ, საქართველოს მიერ მიღწეული პროგრესი იქნება აღიარებული და ჩვენ ვიპოვით გზებს. ზუსტად რა ფორმით იქნება პროგრესი ასახული, ჯერ გადაწყვეტილი არ არის. ჯერ სამიტის პროგრამა დეტალურად გადაწყვეტილი არ არის.

საქართველომ უნდა გააგრძელოს რეფორმები, შეიარაღებული ძალების მოდერნიზება, დააკმაყოფილოს ნატოს სტანდარტები, განამტკიცოს კანონის უზენაესობის დაცვა, უზრუნველყოს დამოუკიდებელი მართლმსაჯულება, ებრძოლოს კორუფციას. ეს არის კარგი საქართველოსთვის და ეხმარება საქართველოს წევრობის გზაზე“- განაცხადა იენს სტოლტენბერგმა პირველი არხის ჟურნალისტის ქეთევან ქარდავას კითხვის საპასუხოდ.