"მე დავრჩები" - კალაძის თქმით ის "ქართული ოცნების" პოლიტსაბჭოს გენერალური მდივნის თანამდებობას შეინარჩუნებს

პოლიტიკა - 12:11, 27 Apr, 2018

1991

პარტია „ქართული ოცნების“ პოლიტიკურ საბჭოში შემავალი პირების რაოდენობა შემცირდება - ვინ დარჩება პოლიტსაბჭოში და ვინ წავა? ბიძინა ივანიშვილი პოლოტიკაში ოფიციალურად დაბრუნების შემდეგ პარტიის პოლიტსაბჭოს გადახალისებას იწყებს, თუმცა, დეტალებზე კომენტარები ჯერჯერობით არ კეთდება.

„რა თქმა უნდა ცვლილებები იქნება, რა რაოდენობა იქნება, ვინ დარჩება ამას უახლოეს მომავალში გაიგებთ, მე დავრჩები“, - განაცხადა კახა კალაძემ.

ჟურნალისტის კითხვაზე, რამდენად რეალურია გავრცელებული ინფორმაცია იმის შესახებ, რომ ბიძინა ივანიშვილი „ქართული ოცნების“ საპრეზიდენტო კანდიდატი იქნება, დედაქალაქის მერმა აღნიშნა, რომ ეს არ შეესაბამება სიმართლეს:

„არ არის ეს სწორი ინფორმაცია, არ შეესაბამება სიმართლეს“, - აღნიშნა კალაძემ.

რაც შეეხება მმართველ გუნდში არსებულ კრიზისს, კახა კალაძე აცხადებს, რომ უმრავლესობის დაშლის საფრთხე არ არსებობს:

„გუნდში არანაირი კრიზისი არ არსებობს, შეიძლება გარკვეულ ძალებს, ადამიანებს, სურვილი ჰქონდეთ, რომ გუნდში იყოს განხეთქილება, იყოს კრიზისი, თუმცა, მე რამდენიმე კვირის წინ ვთქვი და კიდევ გავიმეორებ, რომ უმრავლესობის დაშლის საფრთხე არ არსებობს“, - განაცხადა კალაძემ.