ვთხოვ ბატონ ბიძინას არ დაგვზარდეს და დაბრუნდეს პრემიერის ან პრეზიდენტის პოსტზე

ვთხოვ ბატონ ბიძინას არ დაგვზარდეს და დაბრუნდეს პრემიერის ან პრეზიდენტის პოსტზე - შალელაშვილი

პოლიტიკა - 15:50, 26 Apr, 2018

2609

უმრავლესობის წევრი შოთა შალელაშვილი თვლის, რომ ბიძინა ივანიშვილი არის ერთადერთი ადამიანი, რომელსაც გააჩნია რესურსი, რომ ქვეყნის წინაშე მდგარ გამოწვევებს გაუმკლავდეს:

„ბიძინა ივანიშვილი დაბრუნება განაპირობა ქვეყანაში განვითარებულმა მოვლენებმა და მიმდინარე პროცესებმა. მე მივესალმები ამას და მინდა მთელ ქართველ საზოგადოებას მივულოცო ბატონი ბიძინას დაბრუნება, ეს არის ქვეყნის სტაბილიაციისა და ქვეყნის ეკონომიკური განვითარების გარანტი. კიდევ ერთხელ გილოცავთ, ეს დღე არის უმნიშვნელოვანესი ქართულ პოლიტიკაში.

თვითონ ჩვენი ლიდერები აცხადებენ, რომ პარტიის გაძლიერებისა და მისი უკეთ ფუნქციონირებისათვის ბატონი ბიძინას დაბრუნება იყო დროული და აუცილებელი. ჩვენი ქვეყნის წინაშე მდგარი გამოწვევებიდან გამომდინარე ბატონი ბიძინას დაბრუნება ერთადერთი გამოსავალი იყო. მხოლოდ ბატონ ბიძინას შეუძლია ეს თემები დაალაგოს და მადლობა ღმერთს, რომ ქვეყანაში გვყავს ისეთი ადამიანი, როგორიც ბატონი ბიძინა ივანიშვილია, რომელსაც აქვს უმაღლესი ლეგიტიმაცია ხალხში, რომელიც დაალაგებს ჩვენს წინაშე მდგარ გამოწვევებს.“- განაცხადა შოთა შალელაშვილმა.

შალელაშვილი ივანიშვილს სთხოვს, რომ პოლიტიკაში უფრო აქტიური იყოს და თუ საჭირო იქნება პრემიერის ან პრეზიდენტის პოსტიც დაიკავოს.

„მე მინდა მადლობა გადავუხადო ბატონ ბიძინას დაბრუნებაში და ვთხოვო უფრო აქტიურად ჩაერთოს ქვეყნის მართვაში. თუ უფრო აქტიური იქნება და ქვეყანა მოითხოვს მის დაბრუნებას აქტიურ პოლიტიკაში, მხედველობაში მაქვს პრემიერის ან პრეზიდენტის თანამდებობა, ვთხოვ ბატონ ბიძინას, რომ ამისთვისაც არ დაგვზარდეს.“- განაცხადა შალელაშვილმა.