"იმედია ჩვენ დავრჩებით და ეს არ იქნება ვიწრო, ჯიბის პოლიტსაბჭო, რასაც აქამდე აპირებდნენ "- ქანთარია ივანიშვილის დაბრუნებას დაპირისპირებას უკავშირებს

პოლიტიკა - 15:43, 26 Apr, 2018

1700

„ქართული ოცნების“ გენერალური და აღმასრულებელი მდივნებისგან განსხვავებით, პარტიის ერთ-ერთი ყველაზე სტაჟიანი წევრი ნუკრი ქანთარია, ბიძინა ივანიშვილის პოლიტიკაში დაბრუნებას გარდაუვალ აუცილებლობას უკავშირებს, ამის ერთ-ერთ მიზეზად კი „ქართულ ოცნებაში“ არსებულ დაპირისპირებას ასახელებს:

“ჩემთვის მოოულოდნელი არ იყო ეს გადაწყვეტილება, ადრე მეც რამდენჯერმე ვთხოვე, რომ პროცესებს დაბრუნებოდა. როგორც ჩანს, მან გარდაუვალი აუცილებლობა დაინახა, ამას რა თქმა უნდა, ხელი შეუწყო იმ უაღრესად დაპირისპირებულმა, განსხვავებულმა აზრებმაც და საჭირო გახდა მისი მოსვლა.
ბიძინა არის უპირობოდ აღიარებული ლიდერი, არა მარტო „ქართული ოცნების“, არამედ საზოგადოების დიდი ნაწილის. სამწუხაროდ „ქართულ ოცნებაში“ ბუნებრივი ლიდერები ვერ წარმოიშვნენ და იყვნენ მხოლოდ თანამდებობრივი ლიდერები, რომლებიც თანამდებობიდან მიდიან და მათი ასავალ-დასავალი აღარ ვიცით. ბევრი რამე იქნება დასალაგებელი და შესაცვლელი, იმედი მაქვს ამას ერთად შევძლებთ. იმედი მაქვს, რომ პოლიტსაბჭოს ახალ შემადგენლობაში აუცილებლად დავრჩებით ჩვენ - განსხვავებული აზრის მქონე ხალხიც და ეს არ იქნება ვიწრო, ჯიბის პოლიტსაბჭო, რასაც ალბათ აქამდე აპირებდნენ. მე მგონი პროცესები იქნება გაჯანსაღებისკენ და ამას მივესალმები.“- განაცხადა ნუკრი ქანთარიამ.

ქანთარიას თქმით, მას არ მიაჩნია, რომ ივანიშვილი პრემიერად დაბრუნებას გეგმავს:

„არა მგონია, რომ ბიძინა ივანიშვილმა პრემიერის რანგში დაბრუნება გადაწყვიტოს, მმართველი პარტიის თავმჯდომარის რანგში დაბრუნება აბსოლუტურად საკმარისია იმისთვის, რომ პროცესები დადებითი მიმართულებით წავიდეს.“- აღნიშნა ქანთარიამ.