"ერთადერთი ვისთვისაც ეს ცუდია, საკუთარ გუნდში უავტორიტეტო კვირიკაშვილია"- ხიდაშელი ივანიშვილის დაბრუნებაზე

სოც.მედია - 14:06, 26 Apr, 2018

2467

ბიძინა ივანიშვილის პოლიტიკაში დაბრუნებას კოალიცია „ქართული ოცნების“ ყოფილი წევრი და თავდაცვის ყოფილი მინისტრი თინათინ ხიდაშელი ეხმაურება. ხიდაშელი ივანიშვილის გადაწყვეტილებას სწორს უწოდებს და აცხადებს, რომ მან უნდა აიღოს პასუხისმგებლობა ქვეყანაში მიმდინარე მოვლენებზე.

ხიდაშელის შეფასებით, ამ პროცესებმა აჩვენა რომ ქვეყნის მოქმედ პრემიერ-მინისტრს ავტორიტეტი არ აქვს და საკუთარ გუნდში არაფერს ეკითხებიან. დღევანდელი გადაწყვეტილებით კი მისი ეს სტატუსი საბოლოოდ გაფორმდა.

"ჩემი დაბრუნება რა თქმა უნდა, არ იქნება სწორი... ღმერთმა ნუ ქნას, ჩემი დაბრუნება. მეორედ მოსვლას ვადარებ ამას..." - თქვა ივანიშვილმა ტელეკომპანია "იმედის" ეთერში 2015 წლის იანვარში.

ასე ფიქრობდა ბატონი ივანიშვილი, მე კი მგონია რომ ეს გადაწყვეტილება ცოტა დაგვიანებულია, მაგრამ სწორია.

ის საჯარო პოლიტიკაში უნდა დაბრუნდეს და შესაბამისად, პასუხისმგებლობა აიღოს ყველაფერზე, კარგზეც და ცუდზეც, საჯარო სივრცეში იყოს, კითხვებს პასუხი გასცეს...

კარგი ამბავია პოლიტიკური ცხოვრების გაჯანსაღებისთვის დღევანდელი გადაწყვეტილება.

ერთადერთი ვისთვისაც ეს ცუდია ის არის ვინც გვამცნო ამის შესახებ. დღეს ქვეყნის პრემიერმა უკვე ღიად გვითხრა ის რაც აქამდეც ვიცოდით, რომ ის პოლიტიკაში არ არის, არაფერს ეკითხებიან საკუთარ გუნდში, ავტორიტეტი არ ყოფნის, და დღეიდან უკვე გააფორმა საკუთარი სტატუსი.

ეს კი ცალსახად ცუდი ამბავია. პრემიერია მაინც. საკუთარ გუნდში უავტორიტეტო პრემიერი, რომელსაც როგორც თავად გვითხრა საერთო ღირებულებების მქონე ზაზა პაპუაშვილმა რამდენიმე დღის წინ მიუთითა "ყოჩები და ბელადები" არ უნდა ვეძებოთო."- წერს თინათინ ხიდაშელი ფეისბუკზე.