რელიგიური გრძნობების შეურაცხყოფა - ,,ეს დეპუტატები შუა საუკუნეებში ჩირაღდნებით ირბენდნენ და 1937 წელს მაუზერით ხალხს დახვრეტდნენ"

პოლიტიკა - 11:39, 26 Apr, 2018

1084

"ერთიანი ნაციონალური მოძრაობის" ერთ-ერთი ლიდერი რომან გოცირიძე ამბობს, რომ "დეპუტატები, რომლებიც რელიგიური გრძნობების შეურაცხყოფის კრიმინალიზებას უჭერენ მხარს, შუა საუკუნეებში კუდიანებზე მონადირეები იქნებოდნენ და ხელში ჩირაღდნებით ირბენდნენ, ხოლო 1937 წელს მაუზერებით ხალხს დახვრეტდნენ".

დეპუტატის შეფასებთ, ახლა ასეთ ადამიანებს "მხოლოდ კალამი უჭირავთ და კანონპროექტებს ჯღაბნიან.

“სისხლის სამართლის კოდექსში დაგეგმილი ცვლილებების ბევრი მხარდამჭერი საჭოთა პერიოდში ნაცხოვრები ადამიანია. მაშინ კომუნისტური გრძნობების შეურაცხყოფისთვის ადამიანებს აუბედურებდნენ. საკმარისი იყო გეთქვა, რომ კომუნისტური სისტემა უვარგისია, რომ დიდი პობლემები შეგექმნებოდა ან დაგაპატიმრებდნენ, ან დაგხვრეტდნენ.

დღეს ამათ ხელში კალამი უჭირავთ და კანონებს ჯღაბნიან. გაუგებარია, როგორ უნდა გავზომოთ გრძნობების ჭეშმარიტება, რომელი გრძნობის შეურაცხყოფა შეიძლება და რომლის - არა? ათეისტს სწამს, რომ არ არსებობს. მორწმუნეს სწამს, რომ - არსებობს. რომლის რწმენა არის ნამდვილი? ათეისტმა რომ შეიტანოს კანონპოექტი მისი რწმენის შეურაცხყოფისათვის, რატომ არ უნდა მივიღოთ, თუ ინიცირებულ კანონპროექტს ვიღებთ?! დღევანდელ პარლამენტს არ შეუძლია ქვეყანა პროგრესული მიმართულებით წაიყვანოს - პირიქით, უკან ექაჩება“, - ამბობს რომან გოცირიძე.

"პატრიოტთა ალიანსის" ლიდერი ემზარ კვიციანი მოითხოვს, რომ რელიგიური გრძნობების შეურაცხყოფა დასჯადი გახდეს, თუმცა სანქცია არ უნდა შეეხოს სასულიერო პირს, რომელიც სხვა რელიგიურ გრძნობებს ამბიონიდან ქადაგების დროს შეურაცხყოფს.