ევროკავშირი შენგენის ზონაში მგზავრობის წესებს ამკაცრებს - ვიზალიბერალიზაციით მოსარგებლეებს ნებართვის მიღება და 7 ევროს გადახდა მოუწევთ

პოლიტიკა - 16:30, 25 Apr, 2018

3029

ევროკავშირს უვიზო მიმოსვლით მოსარგებლე ქვეყნების მოქალაქეებისთვის მოგზაურობის ნებართვის სისტემა შემოაქვს, რომელიც ევროპაში გასამგზავრებლად ავტორიზაციის მისაღებად, ონლაინ ანკეტის შევსებას ითვალისწინებს. აღნიშნულთან დაკავშირებით შესაბამის შეთანხმებას ევროკავშირის საბჭომ და ევროპარლამენტმა დღეს მიაღწიეს. ავტორიზაციისთვის ონლაინ განაცხადის შევსება 7 ევრო ეღირება.

აღნიშნული გადაწყვეტილება გავრცელდება იმ 1.4 მილიარდ მოქალაქეზე , იმ დაახლოებით 60 ქვეყნიდან, რომლებიც ევროპასთან უვიზო მიმოსვლის რეჟიმით სარგებლობენ, მათ შორისაა აშშ, კანადა, მალაიზია და პარაგვაი.

კონტროლი დაეფუძნება მონაცემთა ბაზაში შეგროვებულ ინფორმაციას და ნებართვის მიღებაც სწორედ ამ ანკეტაზე იქნება დამოკიდებული.

ანკეტაში შეტანილი ინფორმაცია ავტომატურ რეჟიმში შემოწმდება ევროკავშირისა და ინტერპოლის მონაცემთა ბაზაში, რის საფუძველზეც დადგინდება, აქვს თუ არა კონკრეტულ მოქალაქეს ევროპაში შესვლის უფლება. თუ სისტემამ საეჭვო ვერაფერი აღმოაჩინა, ევროპაში გამგზავრების ნებართვას მოქალაქე დაუყოვნებლივ მიიღებს. ევროპაში მოგზაურობის ავტორიზაცია სამი წლის ვადით გაიცემა.

შენგენის ზონაში მოსახვედრად სამგზავრო დოკუმენტის და ნებართვის ასაღებად ელექტრონული ვერსიის შევსების დროს აუცილებელია მოხდეს საცხოვრებელი ადგილის, დაბადების ადგილის, საპასპორტო მონაცემების, გასამგზავებელი ქვეყნის, ვადების და სასტუმროს შესახებ ინფორმაციის მითითება. განსაკუთრებულ შემთხვევებში მოხდება აპლიკანტის გასაუბრებაზე დაბარებაც.

შეთანხმება ასევე ითვალისწინებს, იმას რომ ყველა საჰაერო და საზღვაო ტრანსპორტის ოპერატორმა უნდა შეამოწოს აქვს თუ არა მგზავრს ავტორიზაცია. სამ წელში კი ღონისძიება გავრცელდება ავტობუსების კომპანიებზეც.

სისტემის განვითარების ხარჯი დაახლოებით 200 მილიონი ევრო იქნება, ყოველწლიურად კი მისი მუშაობისთვის 85 მილიონი ევრო დაიხარჯება.

ევროპაში მოგზაურობის საინფორმაციო და ავტორიზაციის სისტემა (ETIAS)-ის შესახებ ევროპარლამენტთან მიღწეული შეთანხმების შემდეგ, დოკუმენტს ევროდეპუტატებმა უნდა უყარონ კენჭი.

ევროპაში მოგზაურობის საინფორმაციო და ავტორიზაციის სისტემა 2020 წლიდან უნდა ამოქმედდეს.