"ძალიან მწარე გაკვეთილები მივიღეთ" - საპატრიარქო რელიგიური გრძნობების შეურაცხყოფის დასჯადობის იდეას მხარს უჭერს

პოლიტიკა - 16:13, 25 Apr, 2018

1444

სრულიად საქართველოს კათოლიკოს-პატრიარქის მდივანმა, დეკანოზმა მიქაელ ბოტკოველმა პირველ არხს განუცხადა, რომ "საქართველოს საპატრიარქო მხარს უჭერს იდეას, რომ რელიგიური გრძნობების შეურაცხყოფა სისხლის სამართლებრივი წესით დასჯადი იყოს".

„საპატრიარქო იდეას მხარს უჭერს, რადგან ამის გამო ჩვენ ძალიან მწარე გაკვეთილები მივიღეთ“, - ამბობს სასულიერო პირი და დასძენს, რომ საზოგადოებაში არის მოლოდინი, საკითხი დადებითად გადაწყდეს.

რა იგულისხმება რელიგიური გრძნობების შეურაცხყოფაში, დეკანოზი ამ ეტაპზე ვერ აკონკრეტებს და ამბობს, რომ კანონპროექტის ავტორებთან შეხვედრის შემდეგ გაარკვევენ, სად გადის ზღვარი შეურაცხყოფასა და სიტყვის, გამოხატვის თავისუფლებას შორის.

„დღეს გავიგეთ და ხომ უნდა ჩამოვყალიბდეთ?! მართლა გასარკვევია, რა ითვლება შეურაცხყოფად, ზღვარი სად გადის, რისი უფლება შეიძლება ჰქონდეს ადამიანს და რისი უფლება შეიძლება არ ჰქონდეს“, – ამბობს დეკანოზი.

კითხვაზე, შეიძლება თუ არა ჩაითვალოს რელიგიური გრძნობების შეურაცხყოფად, მაგალითად, მხატვარ ლია უკლებას ქმედება, რომელმაც ფეხმძიმე ღვთისმშობელი პისტოლეტით ხელში დახატა და რომლის ნახატსაც სასულიერო პირების მხრიდან მწვავე გამოხმაურება მოჰყვა, პატრიარქის მდივანი აცხადებს, სხვას ვერაფერს იტყვის და მან არ იცის, ვინ არის ლია უკლება.