"ამ შეხვედრას ოცნება გამოიყენებს პრეზიდენტზე თავდასასხმელად"- რა მოლოდინით ხვდება ოპოზიცია პრეზიდენტს

პოლიტიკა - 15:57, 25 Apr, 2018

1304

საპარლამენტო ოპოზიცია ვარაუდობს, რომ საკანონმდებლო ორგანოში პრეზიდენტის გამოსვლას მმართველი გუნდი გიორგი მარგველაშვილზე თავდასხმისთვის გამოიყენებს.

„ნაციონალური მოძრაობის“ წარმომადგენლები ამბობენ, რომ პრემიერს კანონი ავალდებულებს საკანონმდებლო ორგანოში ეს მოხსენება მოისმინოს.

„თუ მთავრობა პატივს სცემს ამომრჩეველს, თუ იგი იცავს კანონებს და კონსტიტუციას ის აუცილებლად უნდა გამოცხადდეს და მოუსმინოს პრეზიდენტის ბოლო მოხსენებას. თუმცა დარწმუნებული ვარ, რომ ასე არ მოხდება. ეს შეხვედრა იქნება გამოყენებული პრეზიდენტზე თავდასასხმელად და იქნება წარმოჩენილი თუ როგორი უვარგისია საპრეზიდენტო ინსტიტუტი და ის რომ კონსტიტუციაში საპრეზიდენტო არჩევნები გაუქმდა და რომელიღაც ხმოსნები აირჩევენ რამდენიმე წლის შემდეგ რომ ეს არის სწორი,“-განაცხადა რომან გოცირიძემ.

„ევროპული საქართველოს“ წევრი ზურაბ ჭიაბერაშვილი ამბობს, რომ 2 ნაისს მსჯელობა უნდა იყოს იმ მძიმე ეკონომიურ მდგომარეობაზე რომლის წინაშეც საზოგადოება დგას.

„მთავრობამ უნდა მოისმინოს ის, თუ რა პრობლემების წინ დგანან მოქალაქეები, პრეზიდენტმა უნდა გაახმოვანოს თითოეული ადამიანის პრობლემა. ბუნებრივია ჩვენ დავსვამთ შეკითხვებს და ჩვენი კითხვები იქნება სწორედ ამაზე. რატომ იმატებს კრიმინალი, რატომ არის ეკონომიკური კრიზისი. რატომ არის ასეთი გაჭირვება,“-განაცხადა ზურაბ ჭიაბერაშვილმა.

პრეზიდენტის სიტყვით გამოსვლა პარლამენტში 2 მაისს იგეგმება.