რა შემთხვევაში არ გაუშვებენ საქართველოს მოქალაქეებს შენგენის ზონაში

რა შემთხვევაში არ გაუშვებენ საქართველოს მოქალაქეებს შენგენის ზონაში - ახალი საკანონმდებლო ცვლილება

პოლიტიკა - 15:40, 25 Apr, 2018

25555

“საქართველოს მოქალაქეების საქართველოდან გასვლისა და საქართველოში შემოსვლის წესების შესახებ“ კანონში ცვლილებების შეტანა იგეგმება, რომლის მიზანიც საქართველოს მოქალაქეების მიერ უვიზოდ მოგზაურობის შესაძლებლობის არაკეთილსინდისიერად გამოყების შემთხვევების შემცირებაა.

ცვლილებით განსზღვრულია იმ დოკუმენტების ჩამონათვალი, რომლის არქონის შემთხვევაშიც მოქალაქეს, რომელიც ევროკავშირის/შენგენის სივრცის იმ ქვეყანაში მიემგზავრება, რომელთანაც საქართველოს უვიზო მიმოსვლის რეჟიმი აქვს, შეიძლება საზღვრის გადაკვეთაზე უარი ეთქვას.

ეს დოკუმენტებია:

ბიომეტრიული პასპორტი, რომელიც უკანასკნელი 10 წლის განმავლობაშია გაცემული და რომლის მოქმედების ვადაც საქართველოში დაბრუნების დღისათვის არანაკლებ სამი თვეა.

უკან დასაბრუნებელი სამგზავრო ბილეთი.

სასტუმროს/საცხოვრებელი ბინის მოქმედი ჯავშანი ან სხვა დამადასტურებელი დოკუმენტი და მისამართი ან ევროკავშირის/შენგენის სივრცის ქვეყნის ტერიტორიაზე ლეგალურად მცხოვრები მასპინძლის მისამართი.

სამოგზაურო დაზღვევა.

მოგზაურობის ფინანსური უზრუნველყოფის დამადასტურებელი დოკუმენტი.

დღეს მოქმედი კანონით, საქართველოს მოქალაქეს საზღვრის გადაკვეთაზე უარი იმ შემთხვევაში შეიძლება ეთქვას, თუ სამართალდამცავი ორგანოების მიერ იძებნება ან თუ ყალბ ან ძალის არმქონე საბუთებს წარადგენს. ევროკავშირის/შენგენის სივრცის ქვეყნების მესაზღვრეები კი ადგილზე იღებებენ საქართველოს მოქალაქის შეშვება-არშეშვების შესახებ გადაწყვეტილებას.

“საქართველოს მოქალაქეების საქართველოდან გასვლისა და საქართველოში შემოსვლის წესების შესახებ“ კანონში ცვლილებების პროექტი “ქართული ოცნების“ დეპუტატებმა: არჩილ თალაკვაძემ, ეკა ბესელიამ, მამუკა მდინარაძემ, გიორგი ვოლსკიმ, კახა კუჭავამ, ოთარ დანელიამ, გიორგი ხატიძემ და ზვიად კვაჭანტირაძემ მოამზადეს.