პლურალისტური, მაგრამ ჯერ არადამოუკიდებელი - საქართველო მედიის თავისუფლების ინდექსით 61-ე ადგილზეა

პოლიტიკა - 15:01, 25 Apr, 2018

1470

საერთაშორისო ორგანიზაცია "ჟურნალისტები საზღვრებს გარეშე" (Reporters Without Borders) მიერ გამოქვეყნებულ მსოფლიო მედიის თავისუფლების რეიტინგში საქართველო 180 ქვეყანას შორის 61-ე ადგილს იკავებს 27.34 კოეფიციენტით. გასულ წელთან შედარებით (64-ე ადგილი - 2017 წ.), საქართველომ 3 საფეხურით აიწია, თუმცა, მისი კოეფიციენტი 0,42-ით შემცირდა (27,76 - 2017 წ.).

"პლურალისტური, მაგრამ ჯერ არადამოუკიდებელი" - ასეა დასათაურებული ორგანიზაციის ვებ-გვერდზე განთავსებული მცირე რეზიუმე საქართველოს შესახებ.

"საქართველოს მედია პლურალისტულია, მაგრამ ჯერჯერობით ძალიან პოლარიზებული. ბოლო წლების რეფორმებმა მედიის მფლობელობის გამჭვირვალობისა და სატელიტური სატელევიზიო პლურალიზმის გაუმჯობესება მოახდინა, მაგრამ მფლობელები კვლავ ხშირად ერევიან სარედაქციო შინაარსში. შესაბამისად, მთავარი ოპოზიციური სატელევიზიო არხის, "რუსთავი 2"-ის საკუთრებაზე არსებულ დავაის შედეგს დიდ გავლენის მოხდენა შეუძლია.ძალადობა ჟურნალისტებზე იშვიათად გვხვდება, თუმცა, არსებობს ინფორმაციები მათ მიმართ გამოთქმული მუქარების შესახებ.

საქართველო, ტრადიციულად, მეზობელი ქვეყნებიდან დისიდენტებს თავშესაფარს სთავაზობს ხოლმე, ამიტომაც, 2017 წელს, თბილისში აზერბაიჯანელი დისიდენტი ჟურნალისტის ავღან მუხთარლის გატაცებამ საზოგადოებაში შოკი გამოიწვია.

ის მოულოდნელად გაჩნდა პოლიციის იზოლატორში, აზერბაიჯანში, სადაც მას ექვსი წლით თავისუფლების აღკვეთა მიუსაჯეს. საქართველოს უშიშროების სამსახურის ორი მაღალჩინოსანი სამსახურიდან გაათავისუფლეს, მაგრამ საქართველოში წარმოებული გამოძიების პროცესში ჯერჯერობით არ არსებობს დამაჯერებელი ახსნა, თუ როგორ მოხდა ეს" - ნათქვამია რეზიუმეში.

რეიტინგს სათავეში ნორვეგია (7.63), შვედეთი (8.31), ნიდერლანდები (10.01), ფინეთი (10.26) და შვეცარია (11.27) უდგანან. რუსეთი 148 ადგილზეა, 49.96 ქულით, უკრაინა 101-ე (31.16). სიის ბოლოს არიან ჩინეთი (78.29), სირია (79.22), თურქმენეთი (84.20), ერითრეა (84.24), ჩრდილოეთ კორეა (88.87).