იდენტიფიცირებულია, რომელი დანითაა მიყენებული მომაკვდინებელი ჭრილობა

იდენტიფიცირებულია, რომელი დანითაა მიყენებული მომაკვდინებელი ჭრილობა - ხორავას საქმის პროკურორი

პოლიტიკა - 17:27, 24 Apr, 2018

1509

ხორავას ქუჩაზე მოზარდებს შორის მომხდარი მკვლელობის საქმის პროკურორი, ზვიად ფხაკაძე სიცრუეს უწოდებს დღეს გავრცელებულ ინფორმაციას, რომლის მიხედვითაც ექსპერტიზის დასკვნით ვერ დგინდება ჭრილობების მიყენების საგანი.
მისი თქმით, იდენტიფიცირებულია, მომაკვდინებელი ჭრილობა თუ რომელი დანითაა მიყენებული.
ზვიად ფხაკაძეს ამ განცხადების შემდეგ ჟურნალისტებმა მეტი კონკრეტიკა სთხოვეს, თუმცა საქმის პროკურორმა არ დააკონკრეტა რომელი დანით, ვის მიერაა ჭრილობები მიყენებული.

"ბრალდების მხარის მიერ წარდგენილი ექსპერტიზის დასკვნით, დგინდება რიგი დეტალები, რომელიც ასევე თანხვედრაშია გამოძიების სტადიაზე და სასამართლო სხდომაზე გამოკვლეულ ინფორმაციასთან. საქმეზე დაიკითხნენ მოწმეები, მათ შორის, გარდაცვლილების მეგობრები, რომლებიც ადასტურებენ იმ ფაქტობრივ გარემოებებს, რომელიც პირდაპირ ასაბუთებს, რომ დანაშაული ჩადენილია სწორედ იმ ბრალდებულების მიერ, რომლებიც დღეს ბრალდებულის სკამზე არიან.

აღნიშნული გარემოებები დასტურდება ასევე, სასამართლოში წარდგენილი ექსპერტიზის დასკვნითაც. აღნიშნულ დასკვნაში საუბარია, თუ რა ჭრილობები იქნა მიყენებული, ასევე რომელი დანით არის ეს ჭრილობები მიყენებული. კერძოდ, საუბარია, იმ ორ დანაზე, რომელიც საქმის გამოძიების სტადიაზეა ამოღებული“, - აცხადებს ფხაკაძე.

როგორც პროკურორი განმარტავს, დღეს წარდგენილი ექსპერტიზის დასკვნა საქმეში ერთადერთი მკიცებულება არ არის.

„ხაზი მინდა გავუსვა, რომ ეს არ არის ერთი მტკიცებულება, ეს არის ერთ-ერთი მტკიცებულება, რომლითაც კიდევ ერთხელ დასტურდება, რომ ბრალად შერაცხული ქმედება ბრალდებულების მხრიდანაა ჩადენილი.