"ვერ დაადგინეს ამ ორი დანიდან რომლით მოხდა დაჭრა" - სარალიძე ექსპერტიზის სკანდალურ დასკვნაზე საუბრობს

პოლიტიკა - 14:28, 24 Apr, 2018

1902

ხორავას ქუჩაზე მოკლული 15 წლის დავით სარალიძის მამა, ზაზა სარალიძე აცხადებს, რომ ექსპერტიზის დასკვნით დაუდგენელია, რომელი დანით ან ვინ მიაყენა სასიკვდილო ჭრილობა მის შვილს.

"ექსპერტიზის მიერ დადებულ დასკვნაში წერია, რომ ვერ დადგინდა, ჩემი შვილისთვის მომაკვდინებელი ჭრილობა რომელი დანით და რა იარაღით იყო მიყენებული, - თქვა სარალიძემ მას შემდეგ, რაც ბრალდების მხარემ სასამართლოში კომპლექსური ექსპერტიზის დასკვნა წარადგინა.

"დასკვნაში ნათლად ჩანს, რომ ის მომაკვდინებელი, არტერიული ჭრილობა ამ ორი დანით არაა მიყენებული. შესაბამისად, ვისგან იყო მიყენებული ჭრილობა, ამის დადგენაც შეუძლებელია. თუ არ არსებობს იარაღი, რა იარაღით მიაყენეს ჭრილობა, შესაბამისად დამნაშავეც გამოვლენილი არ არის...

ეს ორი ბრალდებული, რომელიც ბრალდებულის სკამზე ზის, ნამდვილად დამნაშავეა, ნამდვილად მიესჯებათ საკადრისი სასჯელი, მაგრამ მე უკვე ეჭვი მიჩნდება, რომ კიდევ შესაძლებელია სხვა იარაღიც იყო გამოყენებული. დანები აქვთ, ჩემი შვილის სხეული ჰქონდათ, ტანსაცმელიც აქვთ და ვერ დაადგინეს ამ ორი დანიდან რომელიმელიმე გამოყენებული იყო თუ არა. ეს ხომ აბსურდია?! მაშინ რაღა ექსპერტია? ჩემი აზრით, სხვა იარაღიც გამოიკვეთა, მაგრამ გამოძიებამ აბსოლუტურად ყველაფერი შეცვალა და ეს ექსპერტიზის დასკვნა მოარგო მოწმეების ჩვენებებს. ჩემი შვილის მომაკვდინებელ ჭრილობაზე არცერთი დანა არ არის მითითებული. არც ეს ორი დანაა მითითებული და არც სხვა იარაღია მითითებული. მომავალ სხდომაზე დაიკითხებიან ექსპერტები, რომლებმაც ეს შედეგები გამოიკვლიეს და ვნახოთ, რა კითხვებს გასცემენ პასუხს", - აცხადებს სარალიძე.