ავტობუსების გაჩერებებზე სხვა ტრანსპორტის გაჩერება იკრძალება - პარლამენტი საკანონმდებლო ინიციატივას განიხილავს

პოლიტიკა - 21:12, 20 Apr, 2018

5587

პარლამენტში დრეს გამართულ პლენარულ სხდომაზე, პარლამენტის წევრების, კახაბერ კუჭავასა და ნინო წილოსანის საკანონმდებლო ინიციატივა ორგანული კანონის პროექტი „საქართველოს ორგანულ კანონში „ადგილობრივი თვითმმართველობის კოდექსი“ ცვლილების შეტანის შესახებ“ თანმდევ პროექტებთან ერთად განიხილეს. საკანონმდებლო პაკეტი კახაბერ კუჭავამ მეორე მოსმენით წარადგინა და დეპუტატებს კანონპროექტის მიზნები და ძირითადი დებულებები გააცნო. კანონპროექტების ძირითადი მიზანია დედაქალაქში საგზაო მოძრაობის ორგანიზების შემდგომი გაუმჯობესება - დარეგულირება და საგზაო მოძრაობის განტვირთვის ხელშეწყობა.

„ეს ის საინტერესო კანონპროექტებია, რომლის მთავარი მიზანია საქართველოს დედაქალაქში, ქალაქ თბილისში მოძრაობების განტვირთვა“, - განაცხადა კახაბერ კუჭავამ. მისივე განმარტებით, პროექტის თანახმად, იზღუდება ტრანზიტული მოძრაობები, დგინდება სანებართვო პირობების სამართლებრივი საფუძვლები ტაქსებისათვის. ამავე დროს, თბილისის გარკვეულ ქუჩებზე გარდა საზოგადოებრივი ტრანსპორტის გაჩერების ადგილისა, იკრძალება სამარშრუტო ტაქსების გაჩერება. ასევე, თბილისის ავტობუსების გაჩერებებზე იკრძალება სხვა საავტომობილო სატრანსპორტო საშუალებების გაჩერება - გარდა ავტობუსებისა და სამარშრუტო ტაქსებისა. „ეს კანონპროექტი წარმოადგენს იმ სამართლებრივ საფუძველს, რომლის შემდეგაც მერია და საკრებულო ერთად მიიღებენ გადაწყვეტილებას იმ სანებართვო პირობების შესახებ, რომელიც დადგინდება ტაქსების გადაყვანისთვის. ამავე დროს სატვირთო და სადისტრიბუციო მანქანების გადაადგილება და გაჩერება, რომელიც შეიზღუდება მათი გადაწყვეტილებითვე დადგენილი სპეციალური ადგილების ფარგლებში“, - განაცხადა გარემოს დაცვისა და ბუნებრივი რესურსების კომიტეტის თავმჯდომარემ.