სახელმწიფო აუდიტის სამსახურმა ბელგიის უმაღლეს აუდიტორულ სამსახურთან მემორანდუმი გააფორმა

პოლიტიკა - 11:07, 20 Apr, 2018

979

ბრიუსელში სამუშაო ვიზიტის ფარგლებში, საქართველოს სახელმწიფო აუდიტის სამსახურმა, ბელგიის უმაღლეს აუდიტორულ სამსახურთან ურთიერთთანამშრომლობის მემორანდუმი გააფორმა.

დოკუმენტს ხელი, ბელგიის აუდიტის სამსახურის შენობაში, ბელგიისა და საქართველოს უმაღლესი აუდიტორული სამსახურების ხელმძღვანელებმა ფილიპ როლანდმა (Philippe Roland) და ირაკლი მექვაბიშვილმა მოაწერეს.

მემორანდუმი ითვალისწინებს ორი ქვეყნის ინსტიტუციებს შორის ურთიერთთანამშრომლობის განვითარებას, აუდიტის პროფესიული ცოდნის და ტექნიკურ საკითხებში გამოცდილების გაზიარებას.

მემორანდუმის გაფორმების ცერემონიას ესწრებოდნენ საქართველოს და ბელგიის სახელმწიფო აუდიტის სამსახურების წარმომადგენლები, მათ შორის ჰოლანდიურენოვანი პალატის პრეზიდენტი ჰილდე ფრანსუა (Hilde Francois) და ფრანგულენოვანი პალატის მრჩეველი ფრანც ვასკოტი (Franz Wascotte), ასევე საქართველოს პარლამენტის წევრები, რომლებიც სახელმწიფო აუდიტის სამსახურის დელეგაციასთან ერთად ბელგიაში სამუშაო ვიზიტით იმყოფებიან.

მემორანდუმის ხელმოწერის შემდეგ ირაკლი მექვაბიშვილმა და ფილიპ როლანდმა კოლეგებს სიტყვით მიმართეს და ორი უწყების თანამშრომლობის მნიშვნელობაზე ისაუბრეს.

ბელგიის უმაღლეს აუდიტორულ სამსახურში გამართულ ორდღიან სამუშაო შეხვედრებზე მხარეებმა განიხილეს ორმხრივი თანამშრომლობის საკითხები ფისკალური პოლიტიკის და ინოვაციების მიმართულებით. ასევე, შეხვედრის მონაწილეებმა ორ უმაღლეს აუდიტორულ ინსტიტუციას შორის, გამოცდილების გაზიარების გაფართოების შესაძლებლობებზე იმსჯელეს.

სახელმწიფო აუდიტის სამსახურის დელეგაციის ვიზიტი ბელგიასა და ნიდერლანდებში, საქართველოს პარლამენტის წარმომადგენლებთან ერთად განხორციელდა ევროკავშირის პროექტის „სახელმწიფო აუდიტის სამსახურის ინსტიტუციური გაძლიერების“ ფარგლებში.