,,ოცნების“ თინეიჯერები - „მასწავლებელმა ივანიშვილმა კლასი დატოვა და ერთმანეთს თვითმფრინავებს ესვრიან“

პოლიტიკა - 00:55, 20 Apr, 2018

3987

ექსპერტი გია ხუხაშვილი მიიჩნევს, რომ ბიძინა ივანიშვილი პოლიტიკაში უნდა დაბრუნდეს და პრეზიდენტად კენჭი იყაროს. როგორც მან „პალიტრანიუსის“ გადაცემაში „360 გრადუსი“ განაცხადა, ივანიშვილი ამ გადაწყვეტილებით ქვეყანაში აღადგენს კონსტიტუციურ წესრიგს და ,,თინეიჯერებიც იძულებული გახდებიან დალაგდნენ“.

ამის შემდეგ მისი გარანტიით უნდა ჩატარდეს კონკურენტული არჩევნები, მივიღოთ მულტიპარტიული პარლამენტი და შემდეგ თუ უნდა, წავიდეს პოლიტიკიდან“, - განაცხადა ხუხაშვილმა.

ექპერტი ივანიშვილის პოლიტიკიდან გასვლას და მმართველს უმრავლესობაში მიმდინარე პროცესებს სკოლის გაკვეთილს ადარებს, როცა მასწავლებელი შუა გაკვეთილიდან უდროოდ გადის და კლასში ქაოსი იწყება.

„დაახლოებით ხდება ასეთი რაღაც - წარმოიდგინეთ, სკოლაში მასწავლებელი შუა გაკვეთილიდან გავიდა გარეთ, კლასში არის ჟივილ-ხივილი, ერთმანეთს თვითმფრინავებს ესვრიან... დაახლოებით ეს ხდება ახლაც. მასწავლებელმა კლასი დატოვა უდროო დროს და კლასში დაიწყო ქაოსი. მასწავლებელი კლასში თუ არ დაბრუნდა, ცუდ სურათს მივიღებთ. ესენი არიან პოლიტიკურად უმწიფარი ადამიანები, რომლებიც რას ლაპარაკობენ, თვითონაც არ იციან. მასწავლებელმა უნდა იგრძნოს პასუხისმგებლობა, რომ არ შეიძლება შუა გაკვეთილზე ბავშვების დატოვება. ივანიშვილი უნდა დაბრუნდეს პოლიტიკაში. არავის უნდა პასუხისმგებლობის აღება, სისტემაა დარღვეული გადაწყვეტილების ფორმირების და მიღების, აბსოლუტური ქაოსია“, - განაცხადა ხუხაშვილმა.