ოჯახში მოძალადეებს ელექტრონულ სამაჯურს გაუკეთებენ და პოლიცია მათ დისტანციურად გააკონტროლებს

ოჯახში მოძალადეებს ელექტრონულ სამაჯურს გაუკეთებენ და პოლიცია მათ დისტანციურად გააკონტროლებს - შსს-ს ახალ სისტემას ნერგავს

პოლიტიკა - 15:54, 19 Apr, 2018

6288

ოჯახში მოძალადეების ნაწილს ელექტრონულ სამაჯურს გაუკეთებენ და მათ პოლიცია დისტანციურად გააკონტროლებს. სამინისტროს ამ გეგმების შესახებ, შსს-ს ადამიანის უფლებათა დეპარტამენტის ხელმძღვანელმა ლონდა თოლორდაიამ “პალიტრა ნიუსის” გადაცემაში “”360 გრადუსი” განაცხადა. თოლორდაიას თქმით, ელექტრონული სამაჯურების სისტემის დანერგვას 2018 წლის ბოლოს აპირებენ.

“ელექტრონული სამაჯურს გავცემთ იმ მოძალადეებზე, რომლებიც წარმოადგენენ მაღალი რისკის შემცველს, და იქ, სადაც სიცოცხლის ან ჯანმრთელობის დაზიანების საფრთხე არსებობს. ყველას მიმართ ეს არ იქნება გამოყენებული. ამის შეფასება მოხდება რისკის შეფასების ინსტრუმენტით, რომლის დანერგვასაც შინაგან საქმეთა სამინისტრო უკვე შემდეგი თვიდან გეგმავს. რისკის შეფასების ინსტრუმენტი არის კითხვების, საკითხების ჩამონათვალი, რომელიც აუცილებლად უნდა გაარკვიოს გამომძიებელმა კონფლიქტის ადგილზე და მიღებული შედეგებიდან გამომდინარე მან რისკი უნდა შეაფასოს, ხვალ და ზეგ რა არის მოსალოდნელი ამ მოძალადისგან: არის ის მაღალი, საშუალო თუ დაბალი საშიშროების შემცველი. სამაჯურის გამოყენების საკითხიც ამ რისკის შეფასების დონეზე იქნება დამოკიდებული.“- განაცხადა თოლორდაიამ.