უმრავლესობის სხდომა დღეს აღარ გაიმართება - ორი დაჯგუფება „ქართულ ოცნებაში“

პოლიტიკა - 09:45, 19 Apr, 2018

1905

საპარლამენტო უმრავლესობის სხდომის ჩატარების დრო და ადგილი ამ დრომდე უცნობია. სხდომაზე განხილვის მთავარი თემა მმართველ გუნდში არსებული დაპირისპირება იქნება. ქართულ ოცნებაში კობახიძისა და კვირიკაშვილის გუნდებს შორის არსებულ დაპირისპირებას უარყოფს უმრავლესობის წევრი მამუკა მდინარაძე.

„არანაირი გადაჯგუფებები უმრავლესობაში არ არსებობს. იყო ცალკეული განცხადებები, რომლებმაც გარკვეული უხერხულობა შექმნა და თქვენ მოგცათ იმის თქმის საფუძველი, რომ არის მწვავე დაპირისპირება გუნდში, მაგრამ ასეთი რეალურად არ არის,"-განაცხადა მდინარაძემ, რომელიც ირაკლი კობახიძის გუნდში მოიაზრება.

არსებულ დაპირისპირებაზე და კითხვებზე პასუხის გაცემის აუცილებლობაზე საუბრობს, მმართველი გუნდის კიდევ ერთი წევრი, ამჯერად კვირიკაშვილის გუნდიდან, ნუკრი ქანთარია. მისი თქმით ყველა კითხვას, რომელიც პარტიის ზოგიერთ წარმომადგენელს აქვს, პასუხი აუცილებლად უნდა გაეცეს და სხდომის ჩატარების დიდი ხნით გადაწევა პროცესებზე უარყოფითად აისახება

"ერთი დღე იქით-აქეთ, ეს არაფერი, მაგრამ ეს რომ ჩვენ გადავიტანოთ მარადიულობაში, ეს არის ძალიან ცუდი,"-განაცხადა ქანთარიამ.

უმრავლესობის სხდომა დღეს 21:00 საათზე იყო ჩანიშნული, სხდომის მოწვევის თაობაზე განცხადება გუშინ პარლამენტის თავმჯდომარემ, ირაკლი კობახიძემ გააკეთა. არსებული ინფორმაციით, სხდომის გადადების საბაბი ტექნიკური მიზეზები გახდა.