გიორგი მარგველაშვილი შრომის უსაფრთხოების საკითხებზე საქართველოს და საერთაშორისო პროფკავშირების წარმომადგენლებს შეხვდა

პოლიტიკა - 17:40, 18 Apr, 2018

835

შრომის უსაფრთხოების საკითხები განიხილა დღეს საქართველოს პრეზიდენტმა გიორგი მარგველაშვილმა საქართველოს გაერთიანებულ პროფკავშირებთან და საერთაშორისო პროფკავშირების ორგანიზაციების წარმომადგენლებთან.

გიორგი მარგველაშვილის განცხადებით, შეხვედრისას საუბარი შეეხო სამუშაო ადგილებზე მომხდარ ტრაგიკულ შემთხვევებს, შრომის ინსპექციის მიერ ასეთი შემთხვევებისგან დაცვისა და პრევენციის მექანიზმებს და იმ კანონმდებლობას, რომელიც კიდევ უფრო დასახვეწია.

"ვისაუბრეთ ჩასატარებელ სამუშაოებზე სხვადასხვა ასეთი რისკის შემცველი ადგილების ინსპექტირებასა და და შესაბამისი რეკომენდაციების გაცემის თვალსაზრისით. ჩვენ შევთანხმდით იმაზე, რომ ამ საკითხებთან დაკავშირებით ჩვენი კარი მუდმივად ღია იმისთვის, რომ გვერდში დავუდგეთ პროფკავშირებს და პროფკავშირების სახით ჩვენს მოქალაქეებს, რომლებიც სამუშაო ადგილებში კი არ უნდა იღუპებოდნენ, არამედ უკეთესი ცხოვრებისთვის უნდა შეეძლოთ, რომ იღვაწონ და გამოადგნენ თავიანთ ოჯახებს", - აღნიშნა გიორგი მარგველაშვილმა.

სასახლეში გამართულ შეხვედრას ესწრებოდნენ: პრეზიდენტის საპარლამენტო მდივანი ანა ნაცვლიშვილი, პრეზიდენტის მრჩეველი ადამიანის უფლებების საკითხებში კახა კოჟორიძე, საქართველოს პროფკავშირების გაერთიანების წარმომადგენლები: ირაკლი პეტრიაშვილი, გოჩა ალექსანდრია, რაისა ლიპარტელიანი, თამაზ დოლაბერიძე, ნიკა კაკაშვილი, შრომის საერთაშორისო ორგანიზაციის მმართველი ბორდის წევრი, შსო -ს ასოციაციის თავისუფლების კომიტეტის წევრი, დანიის პროფკავშირების წარმომადგენელი იენს ერიკ ორტი, დანიის პროფკავშირების საერთაშორისო და ევროპულ საკითხთა ოფიცერი რასმუს რააბიერგ ნილსონი, ევროპულ საკითხთა ოფიცერი, შრომის საერთაშორისო ორგანიზაციის და შსო-ს ჟენევის მთავარი ოფისის წარმომადგენელი სერგიუს გლოვაცკასი.