109-ე ბაღში მასწავლებლებმა აღსაზრდელები ჯგუფებში თვითნებურად შეიყვანეს

109-ე ბაღში მასწავლებლებმა აღსაზრდელები ჯგუფებში თვითნებურად შეიყვანეს - რას აცხადებს ბაღის დირექტორი

პოლიტიკა - 11:04, 18 Apr, 2018

2032

109-ე ბაღის დირექტორის თამარ სირბილაძის თქმით, მას დედაქალაქის მთავრობისგან მიღებული აქვს გარანტიები, რომ საბავშვო ბაღის ტერიტორია არ გაიყიდება და იქ ისევ ბაღი აშენდება. ბაღის დირექტორი უარყოფს ინფორმაციას იმის შესახებ, რომ მან ექსპერტიზის დასკვნის შესახებ დიდი ხანია იცოდა და ეს ამბავი მშობლებს და ბაღის პერსონალს დაუმალა. მისი თქმით, იმის შესახებ, რომ ბაღი ავარიულია და უნდა დაიხუროს ინფორმაცია მასაც ცოტა ხნის წინ მიაწოდეს.

„მომიტანეს ექსპერტიზის დასკვნა, სადაც წერია რომ არის საშიში და საჭიორებს დამატებით გამოკვლევებს. დროებით გადავნაწილდებით სხვადასხვა ბაღებში. მე მაქვს გარანტიები და ვიცი, რომ ბაღი რჩება.“- განაცხადა თამარ სირბილაძემ. მისი თქმით, ინფორმაცია იმის შესახებ რომ მშობლები და აღმზრდელები, მისი თანამდებობიდან წასვლას ითხოვენ, მედიისგან გაიგო.

მასწავლებლების ნაწილმა აღსაზრდელები ჯგუფებში თვითნებურად შეიყვანა და აღმზრდელობითი პროცესი განაახლეს. თამარ სირბილაძის თქმით, ბაღი დახურულია და სასწავლო პროცესი ოფიციალურადაა შეჩერებული, ამიტომ მას მოუწევს, რომ მასწავლებლებს დაელაპარაკოს , რათა ეს თვითნებური პროცესი შეწყვიტონ.

ბაღის აღმზრდელები, რომლებმაც ბავშვები ჯგუფებში თვითნებურად შეიყვანეს, კითხვაზე ვინ იღებს პასუხისმგებლობას ბავშვების უსაფრთხოებაზე, აცხადებენ რომ მშობლებმა და მასწავლებლებმა, ეს გადაწყვეტილება ერთდროულად მიიღეს.

მშობლების ინფორმაციით, ბაღების მართვის სააგენტოს წარმომადგენლები დღეს ბაღში მისვლას და ინვენტარის წაღებას გეგმავენ.

"ნიუპოსტის" კორესპოდენტი ოფიციალური ინფორმაციაზე დაყრდნობით იტყობინება, რომ დღეიდან ბაღი სამხარაულის ექსპერტიზის ბიუროს საექსპერტო დასკვნის საფუძველზე იკეტება. თბილისის საბავშვო ბაგა-ბაღების მართვის სააგენტოში აცხადებენ, რომ დასკვნის მიხედვით, N109 ბაგა-ბაღის შენობის ძირითადი ნაწილის ტექნიკური მდგომარეობა არადამაკმაყოფილებელია და საექსპლუატაციო ვარგიასიანობის თვალსაზრისით, მეორე კატეგორიას მიეკუთვნება და შენობას გამაგრება სჭირდება.

დირექციის ინფორმაციით, N109 ბაგა-ბაღში ამჟამად 731 აღსაზრდელია რეგისტრირებული, რომლებიც კვირის ბოლომდე ახლომდებარე სამ საბავშვო ბაღში გადანაწილდებიან. N128, N16, და N215 ბაღებში მოეწყობა სივრცეები, სადაც დახურული ბაღიდან გადაყვანილი ჯგუფები განთავსდება. გადანაწილებული ჯგუფები სააღმზრდელო პროცესს 23 აპრილიდან გააგრძელებენ.