"ყველაფერს აკეთებს, შეწყალებები გადაფაროს, მისი ყოფილი ქმარი იუსტიციის უმაღლესი საბჭოს სკოლის ხელმძღვანელია"

"ყველაფერს აკეთებს, შეწყალებები გადაფაროს, მისი ყოფილი ქმარი იუსტიციის უმაღლესი საბჭოს სკოლის ხელმძღვანელია" - ზარდიაშვილი დოლიძეს პასუხობს

პოლიტიკა - 14:15, 16 Apr, 2018

4260

„ქართული ოცნების“ დეპუტატი ვანო ზარდიაშვილი ანა დოლიძეს პასუხობს და აცხადებს, რომ მისი მეუღლე თინათინ აბრალავა იუსტიციის უმაღლეს საბჭოში რვა წელია მუშაობს.

ზარდიაშვილის თქმით, ანა დოლიძის ყოფილი ქმარი იუსტიციის უმაღლესი საბჭოს სკოლის ხელმძღვანელია.

„ანა დოლიძეს ეს რისთვის სჭირდება? ის იუსტიციის უმაღლეს საბჭოში პრეზიდენტის წარმომადგენელია და ყველაფერს აკეთებს, რომ ის შეწყალებები გადაფაროს, რომელიც მარგველაშვილმა ქორიძისა და ბაქრაძის საქმეებზე განახორციელა. ჩემი მეუღლე იუსტიციის უმაღლეს საბჭოში იმ დროიდან მუშაობს, როდესაც აზრადაც არ მქონდა, რომ პოლიტიკაში მოვხვდებოდი. შესაბამისად, იმაზე მსჯელობა, რომ შეიძლება რაიმე ზემოქმედება მოხდეს, აბსურდულია და ანა დოლიძის ფანტაზიის წყაროა. ანა დოლიძემ იუსტიციის უმაღლეს საბჭოში თუ სკოლაში საკუთარი ოჯახის ნათესავები კარგად მოიკითხოს. თუ ის იტყვის, რომ მასზე ყოფილი მეუღლე გავლენას ახდენს, ამ საკითხზე შემდეგ ვიმსჯელებ. ანა დოლიძის ყოფილი ქმარი იუსტიციის უმაღლესი საბჭოს სკოლის ხელმძღვანელია. იურისტებისგან უნდა მოითხოვოთ დასაბუთება ან ფაქტები, დანარჩენი ნებისმიერი საუბარი ორღობის ჭორაობაა. ანა დოლიძე პრეზიდენტის წარმომადგენელია და ალბათ, მათ შეთახმება აქვთ, რომ მარგველაშვილის ძალიან შტერული შეწყალებები გადაფარონ და აქცენტები რამენაირად სხვა საკითხებზე გააკეთონ. ეს ის ანა დოლიძეა, რომელიც ქართული ჯარის წინააღმდეგ რუსების მხარეს მუშაობდა. კომპანია, რომელიც ჰოლანდიაში იყო დარეგისტრირებული, რუსულია და ქართული ჯარის მიერ ჩადენილ დანაშაულს სწავლობდა”, - განაცხადა ზარდიაშვილმა.

მოსამართლეთა შეფასების დეპარტამენტის დირექტორი უმრავლესობის წევრის ვანო ზარდიაშვილის მეუღლე და ასევე, უმრავლესობის წევრის, მამუკა მდინარაძის ნათესავია - ამის შესახებ იუსტიციის საბჭოს არამოსამართლე წევრი ანა დოლიძე საუბრობს, რომელიც მოსამართლეთა დანიშვნის პოლიტიკურობაზე ამახვილებს ყურადღებას.