ევროკავშირი საქართველოს დახმარების სახით 45 მილიონი ევროს გამოუყოფს

პოლიტიკა - 10:19, 13 Apr, 2018

1232

12 აპრილს, ევროკავშირის საბჭომ, საქართველოსთვის 45 მლნ. ევროს ოდენობის მაკრო-ფინანსური დახმარების გამოყოფასთან დაკავშირებით გადაწყვეტილება მიიღო. ინფორმაციას ამის შესახებ საგარეო საქმეთა სამინისტრო ავრცელებს. უწყების განცხადებით, აღნიშნული ფინანსური დახმარება ხელს შეუწყობს საქართველოს მაკრო-ეკონომიკურ სტაბილურობას, ეკონომიკურ ზრდასა და ქვეყანაში მიმდინარე სტრუქტურული რეფორმების განხორციელებას კანონის უზენაესობის და ადამიანთა უფლებების დაცვის სფეროში.

ევროკავშირის საბჭოს მიერ მაკროფინანსური დახმარების სახით, საქართველოსთვის 45 მილიონი ევროს გამოყოფის გადაწყვეტილებას გამმოეხმაურა საქართველოს პრემიერ-მინისტრი. გიორგი კვირიკაშვილის თქმით, აღნიშნული გადაწყვეტილება საქართველოს მიერ აღებული კურსისა და დემოკრატიული რეფორმების მხარდაჭერის ნათელი გამოხატულებაა:

„მინდა, მადლობა გადავუხადო პრეზიდენტ ტუსკს და ევროკავშირის წევრ ქვეყნებს საქართველოს განვითარების, ქვეყნის მიერ აღებული კურსისა და დემოკრატიული რეფორმების მხარდაჭერისთვის, რისი ნათელი გამოხატულებაც არის 45 მილიონი ევროს ოდენობის ფინანსური რესურსის გამოყოფა.

საქართველო შეუქცევადად განაგრძობს რეფორმებს ევროპული ინტეგრაციის გზაზე და ამ პროცესში ნამდვილად შეუფასებელია ჩვენი დასავლელი პარტნიორების ასეთი მკაფიო მხარდაჭერა.“- განაცხადა გიორგი კვირიკაშვილმა.