თბილისის საკრებულოს სახელდების და სიმბოლიკის კომისიის სხდომაზე კომისიის თავმჯდომარემ თინათინ ნიბლოშვილმა დეპუტატებს მოძრავი ავტობუსების რამდენიმე უსახელო გაჩერების სახელდების საკითხი წარუდგინა. საქმე ეხება, 61 ნომერი ავტობუსის მარშრუტს.

„ეს არის საპილოტე პროექტი, რომელიც გასულ წელს დაიწყო. სატრანსპორტო კომპანიასთან ერთად ვგეგმავთ, რომ ავტობუსებში გაჩერებების გამოცხადების პრაქტიკა დავნერგოთ. შესაბამისად, საჭიროა გაჩერებების სახელდება, საპილოტედ ავიღეთ 61 ნომერი ავტობუსი, რომელიც უნივერსიტეტის საერთო საცხოვრებლიდან ბარათაშვილის ქუჩის მიმართულებით გადაადგილდება და წრიულად მოძრაობს.“- განაცხადა თინათინ ნიბლოშვილმა, მისი თქმით სახელები იმ სახელწოდებების მიხედვით დაერქმევა, რომელიც საზოგადოებაშია მიღებული და გამჯდარი. როგორც ნიბლოშვილმა განაცხადა, გაჩერებების სახელწოდების გამოცხადება, რომელიც არაერთ ქვეყანაშია დამკვიდრებული, მეტ კომფორტს შეუქმნის, როგორც ტურისტებს, ასევე საქართველოს მოქალაქეებსაც და დაეხმარება შშმ პირებს.