ინტერპარტიული ჯგუფის ინფორმაციით ხელისუფლება პოლიტიკური ოპონენტებისათვის დაფინანსების გადაკეტვის ახალ სქემას ამუშავებს, ოპოზიციური პარტიები აცხადებენ, რომ უმრავლესობა ახალ საკანონმდებლო ინიციატივას ამზადებს, რომლის მიხედვითაც დაფინანსება შეეზღუდებათ საარჩევნო ბლოკებს და ფულს მხოლოდ ბლოკის ერთი პარტია მიიღებს.

ოპოზიციას ბლოკებად გაერთიანების ბოლო შანსი 2020 წლის საპარლამენტო არჩევნებში ექნება ერთჯერადი გამონაკლისის სახით.

„ბლოკების გაუქმებას ცდილობდნენ, ახლა ცდილობენ, რომ ბლოკმა დაკარგოს აზრი, პრაქტიკულად ამ ქმედებებს მათთვის შედეგი არ მოაქვს და ახლა მიიღეს გადაწყვეტილება, რომ პოლიტიკურ ორგანიზაციებს, ყველანაირი რესურსი შეუზღუდონ, რომ მათ არსებობა შეწყვიტონ ქვეყანაში და ამით მათ გაიხანგრძლივონ ხელისუფლება“, - აღნიშნავს „ეროვნულ-დემოკრატიული პარტიის“ ლიდერი ბაჩუკი ქარდავა.

„ერთიანი ნაციონალური მოძრაობის“ წევრი თინა ბოკუჩავა აცხადებს, რომ ბლოკებზე საუბარი და აქცენტი „ქართული ოცნების“ მხრიდან არის მხოლოდ ყურადღების გადატანის მცდელობა:

„მილიონობით ლარის მობილიზაციას აკეთებს „ქართული ოცნება“ კორუფციული სქემების გამოყენებით, მათ შორის ტენდერებში გამარჯვებული კომპანიებისგან უზარმაზარი შემოწირულობების მიღებით და რეალურად, ყიდულობს არჩევნების შედეგებს. ასე რომ ბლოკებზე საუბარი და აქცენტი არის მხოლოდ ყურადღების გადატანის მცდელობა, ჩვენ კი ახლა შევიმუშავებთ მოდელს, რომელიც აღმოფხვრის ამ პრობლემას“, - აღნიშნავს თინათინ ბოკუჩავა.