"პარლამენტში უმრავლესობის 110 დეპუტატი უფუნქციოდ დარჩა, კობახიძე ვიწრო ჯგუფის იქით ვერავის ხედავს" -შალელაშვილი

პოლიტიკა - 13:31, 12 Apr, 2018

1606

საპარლმენტო უმრავლესობის წევრის, შოთა შალელაშვილის მოსაზრებით, მმართველი გუნდის დაახლოებით 80-110 დეპუტატი უფუნქციოდ არის დაჩენილი.

მისი განცხადებით, პარლამენტის თავმჯდომარეს მხოლოდ რამდენიმე დეპუტატთან აქვს კომუნიკაცია, ნაწილი კი პარლამენტში უფუნქციოდაა დარჩენილი.

„არიან ისეთი პარლამენტარები, რომლებიც ათმაგ საქმეს აკეთებენ და არის პარლამენტში უმრავლესობის უმრავლესობა, რომელიც უფუნქციოდ დარჩა. აქედან გამომდინარე, არის კითხვები. პარლამენტარები არიან ადამიანები, რომლებიც თავმოყვარეები არიან და უნდათ, დასაქმებულები იყვნენ. არ უდნა ვიყოთ პარლამენტში იმისთვის, რომ მანდატი ვატაროთ. პარლამენტის თავმჯდომარეს, როგორც ერუდირებულს, განათლებულს, ყველამ ვიცით, როგორი გაწონასწორებული ადამიანი ბრძანდება ბატონი პარლამენტის თავმჯდომარე, მაგრამ რაღაც-რაღაცები მასაც აქვს შესაცვლელი, იგივე დეპუტატებთან ურთიერთობა, ცოტა ფართე ჯგუფი უნდა შემოიკრიბოს, არ უნდა შემოიკრიბოს ის გარკვეული წრე, რომელიც მას ჰყავს შემოკრებილი და იმათ იქით ვერაფერს ხედავს,“- განაცხადა შოთა შალელაშვილმა.

დეპუტატმა საპარლამენტო დელეგაციების შემადგენლობაზე ისაუბრა.

„საუბარი საპარლამენტო თანამდებობებზე არ არის. საკანონმდებლო ორგანოში ათი მუდმივმოქმედი დელეგაციაა და ათივეში 10-15 ადამიანია დასახელებული. სიებს რომ გადახედოთ, ვინ არის დელეგაციებში? – სულ რამდენიმე გვარი შეგხვდებათ, ალბათ, ათამდე. დანარჩენი 105-110 დეპუტატი უფუნქციოა. შეიძლება ამ ციფრს ვუტრირებ, მაგრამ 80 ადამიანი ასეთია“,- განაცხადა ჟურნალისტებთან საუბრისას შოთა შალელაშვილმა.