,,გაზპრომ მედიას“ შემოსვლა ძირს უთხრის ეროვნულ უსაფრთხოებას, ოპოზიცია თავის მოკავშირეებით წინ უნდა აღუდგეს ამ საფრთხეებს“

,,გაზპრომ მედიას“ შემოსვლა ძირს უთხრის ეროვნულ უსაფრთხოებას, ოპოზიცია თავის მოკავშირეებით წინ უნდა აღუდგეს ამ საფრთხეებს“ - ნიკა მაჭუტაძე

პოლიტიკა - 18:14, 11 Apr, 2018

1338

"გაზპრომ მედიას" ქართულ ბაზარზე შემოსვლას ეხმაურება პოლიტიკური გაერთიანება ,,სახელმწიფო ხალხისთვის“ ლიდერი. ნიკა მაჭუტაძე აცხადებს, რომ საქართველოს ხელისუფლებას არ შესწევს უნარი წინ აღუდგეს რუსულ პროპაგანდას, უფრო მეტიც, მისი შეფასებით, ,,ქართული ოცნება“ ამ პროპაგანდის ხელშემწყობიცაა.

„რუსული რბილი ძალა კვლავ გვიტევს, ისევ იკვლევს გზას საქართველოს მოქალაქეთა გონების და განწყობებისკენ და საქართველოს ამჟამინდელ ხელისუფლებას კვლავაც არ შესწევს უნარი წინ აღუდგეს რუსულ პოლიტიკურ-ეკონომიკურ კაპიტალს. პირიქით, "ქართული ოცნების" ხელისუფლება ხელისშემწყობად და რუსული პროპაგანდის შემწედ მოევლინა ქართულ სახელმწიფოს.

ამის მორიგი დასტური არის "გაზპრომ მედიას" უზარმაზარი კონცერნის მოწვევა საქართველოში, რომლის მიზანი, ცხადია, ისიცაა, რომ ქართული ბაზრის სრული მონოპოლიზების გზით და ნაცადი პროპაგანდისტული მეთოდებით მოწამლონ ქართული სოციალური და პოლიტიკური აზრი, მეტად მოახდინონ დასავლური პოლიტიკის და ცივილიზაციის დემონიზება, მოიპოვონ კიდევ უფრო მეტი გავლენის აგენტი და სასარგებლო იდიოტი ჩვენს თანამოქალაქეთა შორის.

რუსული პოლიტიკური სიტყვა, მათი სრულიად ურცხვი პროპაგანდა საწამლავია. იმაზე მეტად ვერაგი, ვიდრე ქიმიური საშუალებები იმპერიის სპეც.სამსახურების ხელში.

ჩვენ არ უნდა დავუშვათ "გაზპრომ -მედიას", ამ იმპერიალისტური მონსტრის შემოსვლა და დამკვიდრება საქართველოში.

ეს პირდაპირ ძირს გამოუთხრის ჩვენს ეროვნულ უსაფრთხოებას, ჩვენი სახელმწიფოდ და სუვერენულად არსებობის აღქმას ჩვენსავე თანამოქალაქეების რაღაც ნაწილში.

ეს დაუშვებელია და საზოგადოება, პოლიტიკური ოპოზიცია ყველა თავისი მოკავშირით წინ უნდა აღუდგეს ამ საფრთხეებს. დააზღვიოს მართლაც უმნიშვნელოვანესი სახელმწიფოებრივი და გეოპოლიტიკური რისკები“ - განაცხადა ნიკა მაჭუტაძემ ,,ნიუპოსტთან".