ქართულ ბაზარზე „გაზპრომ მედია“ შემოდის - კომპანია საქმიანობას ბრენდით НТВ-Плюс-ით გეგმავს. ამის შესახებ კომპანიის განცხადებაშია ნათქვამი. არსებული ინფორმაციით, კომპანიის პარტნიორი საქართველოში შპს „მედია ჯგუფი“ იქნება.

„ნიუპოსტთან“ საუბრისას დიმიტრი შაშკინი ამბობს, რომ „გაზპრომ მედიის“ სააქართველოს ბაზარზე შემოსვლა ემსახურება რუსული პროპაგანდის გაძლიერებას:

„როდესაც მთელ მსოფლიოში უკვე არსებობს კონსესუსი, რომ რუსეთი იყენებს მასმედიას პროპაგანდისთვის, თავისი ბოროტი მიზნებისთვის და სხვადასხვა ქვეყნები უკვე ღიად კრძალავენ რუსეთის მასმედიის გავრცელებას საკუთარ ტერიტორიაზე. საქართველო არის უნიკალური ქვეყანა, რომლის ტერიტორიების 20%-იც არის რუსეთის მიერ ოკუპირებული და უშვებს თავის ბაზარზე „გაზპრომის“ კომპანიას, რომელსაც ჰქვია „ენტევე პლუსი“. შესაძლოა ვიღაცამ თქვას რა მოხდა, ისედაც რუსულ არხებს უყურებენ საქართველოშიო, კი, ეს ასეა და ვთვლი, რომ ეს არის უდიდესი შეცდომა, მაგრამ არის ერთი ძალიან მნიშვნელოვანი ნიუანსი, რომელიც ბევრ ადამიანს სამწუხაროდ არ ესმის. როდესაც საკაბელო ტელევიზებში არის ჩართული რუსული არხები, ეს არის ერთი საკითხი, მაგრამ როდესაც ბაზარზე შემოდის გაზპრომის კომპანია, რომელიც არა საკაბელოს მეშვეობით აპირებს რუსული არხების ტრანსლირებას, არამედ თეფშისა და დეკოდერის საშუალებით, უნდა გვესმოდეს სხვაობა და ეს სხვაობა არის მარტივი.

ეს მთავრობა აუცილებლად შეიცვლება და დადგება საკითხი ამ რუსული არხების გათიშვის, ამაში დარწმუნებული ვარ, რადგან შეუძლებელია, რომ ადეკვატურმა მთავრობამ არ აკრძალოს რუსული პროპაგანდისტული არხები საქართველოში. „ენტევე პლუსის“ შემთხვევაში კი ამის შესაძლებლობა მომავალ მთავრობას უკვე აღარ ექნება, იმიტომ, რომ ეს არის თეფში, დეკოდერი და თუ საკაბელოზე შენ შეგიძლია გამოსცე კანონი, რომლითაც გაათიშინებ პროვაიდერებს რუსულ არხებს, თეფშს ვერ გათიშავ, რადგან პირდაპირ „ენტევე პლუსსა“ და აბონენტს შორის მოხდება ურთიერთობა. ეს რუსებს ძალიან კარგად ესმით.

ამ კომპანიისთვის საქართველოს ბაზარი არის ზღვაში წვეთი. ეკონომიკურად არამომგებიანი ბაზარია, ეს არის პროპაგანდისთვის, რუსეთის გავლენისთვის ძალიან მნიშვნელოვანი წინ გადადგმული ნაბიჯი, იმისათვის, რომ პროპაგანდა გააძლიერონ და ჰქონდეთ გარანტია, რომ ვინც არ უნდა მოვიდეს ხელისუფლებაში, რუსულ არხებს ვერ გათიშავს.

ზუსტად ვიცი, რომ შემოვა დემპინგური ფასებით. რაც ბუნებრივია დააზიანებს ქართულ კომპანიებსაც და ფასებით მეტად მიიზიდავს აბონენტებსაც. ჩვენს მთავრობაში ან არის ხალხი, რომელსაც არაფერი ესმის პოლიტიკისა, ან არის ხალხი, რომელიც ღიად ატარებს რუსულ ინტერესებს“, - აცხადებს დიმიტრი შაშკინი.