თუ სახელმწიფო არ იმოქმედებს, იმოქმედებს ხალხი და პოლიტიკური ოპოზიცია - ნიკა რურუა „გაზპრომ მედიას" შემოშვებას ,,თვითმკვლელობას" უწოდებს

პოლიტიკა - 15:01, 11 Apr, 2018

1343

ქართულ ბაზარზე „გაზპრომ მედია“ შემოდის - კომპანია საქმიანობას ბრენდით НТВ-Плюс-ით გეგმავს. ამის შესახებ კომპანიის განცხადებაშია ნათქვამი. არსებული ინფორმაციით, კომპანიის პარტნიორი საქართველოში შპს „მედია ჯგუფი“ იქნება.

„ერთიანი ნაციონალური მოძრაობის“ წევრი ნიკა რურუა ამბობს, რომ იმ შემთხვევაში თუ „გაზპრომ მედია“ საქართველოში შემოვიდა, მისი მიზანი იქნება რუსული პროპაგანდის დანერგვა. როგორც რურუამ ,,ნიუპოსტთან" განაცხადა, მაშინ, როცა მსოფლიო რუსული საფრთხის წინააღმდეგ ერთიანედება, ქვეყანაში ოკუპანტის ასეთი პროპაგანდისტული მანქანის შემოშვება იქნება ,,ნამდვილი თვითმკვლელობა".

„ეს არ არის მედია საშუალება მხოლოდ, ეს არის მთელი კონცერნი - 90 არხის გაერთიანება, რომლის მიზანიც არის საქართველოში რუსული პროპაგანდის გავრცელება და ჩაბეტონება, გამაგრება სიტუაციების მიმართ მათი ხედვისა. მათ შორის, საქართველოს ტერიტორიულ მთლიანობაზე, რომ ის აღარასდროს აღდგება; როგორც რუსები ამბობენ, რომ 2008 წელს საქართველო იყო დამნაშავე რუსეთის აგრესიაში; ის, რომ ნატო და ევროკავშირი და თავისუფალი სამყარო ცუდია; ის, რომ ასადი, ჩრდილოეთ კორეა და პუტინი არის კარგი და ასე შემდეგ. ეს იქნება ტვინების რეცხვის პოლიტიკური იარაღი, ამას მედიასთან არანაირი კავშირი არ აქვს.

ახლა, როცა მთელი მსოფლიო რუსული საფრთხისა და პროპაგანდის წინააღმდეგ ერთიანდება, ოკუპანტი ქვეყნის პროპაგანდისტული მანქანის შემოშვება ნამდვილი თვითმკვლელობა, უკანონობა იქნება. გამორიცხულია, ჩვენ ამას არ დავუშვებთ" - აცხადებს ნიკა რურუა.

მისივე თქმით, სუს-ის ანგარიშის ფონზე, სადაც რუსულ საფრთხეებზე იყო საუბარი, „გაზპრომ მედიას“ ქართულ ბაზარზე შემოსვლა უცნაურია.

"სახელმწიფომ უნდა იმოქმედოს და თუ ის არ იმოქმედებს, იმოქმედებს ხალხი და პოლიტიკური ოპოზიცია ჩაუდგება ამ მოძრაობას სათავეში. ეს არის აუცილებლად ჩასაშლელი, იმიტომ, რომ პიდაპირ ვეპატიჟებით ჩვენს მტერს საკუთარ ბინაში და საძინებელში“, - აცხადებს ნიკა რურუა.