,,გაზპრომის“ მთავარი აქციონერი არა მილერი, არამედ ივანიშვილია“ - სააკაშვილი მიიჩნევს, რომ აშშ-ის სანქციების სიაში ივანიშვილიც უნდა მოხვდეს

პოლიტიკა - 21:39, 10 Apr, 2018

2174

მიხეილ სააკაშვილი ევროპის ყველაზე დიდი სახალხო პარტიის პოლიტიკურ ასამბლეაზე სიტყვით გამოდის. „ნაციონალური მოძრაობის“ ლიდერის მთავარი გზავნილი საქართველოში პოლიტპატიმრების არსებობას ეხება. საქართველოს მესამე პრეზიდენტი მიიჩნევს, რომ სხვა რუს ოლიგარქებთან ერთად, რომლებსაც აშშ-ის სანქციები შეეხოთ, ბიძინა ივანიშილიც უნდა მოხვდეს:

„თქვენ იცით, რომ შემოიღეს სანქციები „გაზპრომის“ ხელმძღვანელის მიმართ ამერიკელებმა, მაგრამ „გაზპრომის“ კერძო აქციონერი, მთავარი, არის არა მილერი, არამედ ბიძინა ივანიშვილი, რა განსხვავებაა მილერსა და ბიძინა ივანიშვილს შორის, როცა „გაზპრომს“ უკვე ურტყამს დასავლეთი? ივანიშვილს სერიოზული პრობლემები აქვს საფრანგეთში იურიდიული, ეს ვიცი დადასტურებით, ვერ ტოვებს ქვეყანას იმის გამო, რომ უცხოეთში თუ წავა შეიძლება შეექმნას სერიოზული პრობლემები სამართალდამცავ ორგანოებთან, ჩემგან განსხვავებით, რადგან მე ყველგან შემიძლია გადაადგილება თავისუფლად და ყველგან კარგად მიღებენ. ასევე დერიპასკა, რომლის მიმართაც შემოიღეს სანქციები, ეს არის ის ადამიანი, რომელიც აფინანებდა ჩვენს წინააღმდეგ საერთაშორისო პრესაში, ჩვენი ხელისუფლების წინააღმდეგ 2005 წლიდან მოყოლებული, მთელი ეს ჭორები, საზიზღრობები, რომელიც ჩვენზე იწერებოდა, მათ შორის არის დაფინანსებული მის მიერ და არავინ არასდროს არ გაიწია მას წინააღმდეგობა და ახლა მოხვდა მას მაგრად კბილებში, პრაქტიკულად დაინგრა მისი ბიზნესიმპერია, ასე რომ ყველაფერი დგება თავის ადგილზე, საბოლოო ჯამში ბოროტება მარცხდება და ჩვენ მივდივართ სწორი მიმართულებით. ეს უნდა დავასრულოთ საქართველოში წელს გამარჯვებით და საქართველოში წელს ივანიშვილის ხელისუფლების გზიდან ჩამშორებით და ხელისუფლების შეცვლით, საქართველოს დაბრუნებით რუკაზე, იმისათვის, რომ საქართველოში გაიზარდოს პენსიები, ხელფასები, გაიზარდოს შესაძლებლობები და ჩვენ ეს ნამდვილად შეგვიძლია“, - განაცხადა მიხეილ სააკაშვილმა.