„უბრალოდ ხეებს კი არ თხრიან, ქვეყანა მოთხარეს... საქართველოში მოხდება ხელისუფლების ცვლილება და უნდა მოვიდეს ეროვნული მთავრობა“

„უბრალოდ ხეებს კი არ თხრიან, ქვეყანა მოთხარეს... საქართველოში მოხდება ხელისუფლების ცვლილება და უნდა მოვიდეს ეროვნული მთავრობა“ - სააკაშვილი

პოლიტიკა - 17:56, 09 Apr, 2018

2466

საქართველოში ცვლილებების აუცილებლობაზე საუბრობს საქართველოს მესამე პრეზიდენტი. მიხეილ სააკაშვილმა ბრიუსელში ევროპარლამენტში გამართული შეხვედრების შემდეგ განაცხადა, რომ საქართველოში ეროვნული მთავრობა უნდა მოვიდეს.

„ჩვენ ვემზადებით დიდი ცვლილებებისთვის საქართველოში. ხედავთ, როგორი სიტუაციაა, როგორ კარგავს საქართველო დროს. გუშინ უნგრეთში ისევ გაიმარჯვა დიდი უპირატესობით ჩემმა პირადმა მეგობარმა და ჩვენმა პოლიტიკურმა პარტნიორმა ორბანმა.

პოლონეთს მართავენ ჩვენი პარტნიორები, რომლებთანაც გვაქვს მჭიდრო ურთიერთობა, ბოლოს და ბოლოს ამერიკაში ზის ტრამპი, რომელიც იყო ნამყოფი საქართველოში, ახორციელებდა პროექტს, რომელიც გააჩერა ივანიშვილმა და ტრამპს ეძახა აფერისტი.

ჩვენ გვყავს მთავრობაში ოლიგარქი, რომელიც მიუღებელია ყველა იმ ხალხისთვის, ვინც ახლა რაღაცას წყვეტს და ქმნის ახალ ტრენდს ევროპაში.

ჩვენ არ გვაქვს დასაკარგი დრო, საქართველო იცლება, საქართველო ნადგურდება, საქართველოში მალე აღარ დარჩება ხალხი, საქართველოს აღარ ექნება მომავალი. ამიტომ ზუსტად ისე, როგორც გააკეთეს უნგრელებმა, ზუსტად ისე,როგორც გააკეთეს პოლონელებმა, ეს ტიპაჟები ვინც ანადგურებს უნდა გაიწიოს საქართველოდან და მოვიდეს ეროვნული მთავრობა, რომელიც დაამთავრებს ანტიქართულ, ანტიქრისტიანულ, ანტისახელმწიფოებრივ პოლიტიკას რუსეთიდან მოვლენილი ბოროტების, ივანიშვილის სახით.

ამ მხრივ რა თქმა უნდა ევროპარლამენტში გვყავს ბევრი პარტნიორი. ჩვენც ვამზადებთ ამათ იმისთვის, რომ საქართველოში მოხდება ხელისუფლების ცვლილება და საქართველო დაბრუნდება ევროპის რუკაზე, როგორც წარმატებული ქვეყანა.

მე ვიქნები თანასწორთა შორის თანასწორი, ერთერთი რიგითი მებრძოლი თუ საჭიროა, მაგრამ ჩვენ ალტერნატივა არ გვაქვს. თვალსა და ხელს შუა გვეცლება ქვეყანა. საქმე იმაშია, რომ უბრალოდ ხეებს კი არ თხრიან ქვეყანა მოთხარეს. ქვეყანას აღარ ჰყავს არამხოლოდ პატრონი, ქვეყანას მომავალი აღარ აქვს. ამიტომ ამ სიტუაციაში ქართველმა ხალხმა უნდა დაიბრუნოს საქართველო“- განაცხადა მიხეილ სააკაშვილმა ,,კურიერთან".

მიხეილ სააკაშვილს შეხვედრები ევროპელ დეპუტატებთან 2 დღის განმავლობაში ექნება. მოლაპარაკებები გაიმართება ევროპის სახალხო პარტიის პრეზიდენტთან. სააკაშვილი ასევე დაესწრება "ევროპის სახალხო პარტიის" პოლიტიკური ოჯახის ასამბლეასაც.