პრემიერ-მინისტრმა სამების ტაძარში მრევლს აღდგომის დღესასწაული მიულოცა

პოლიტიკა - 12:13, 08 Apr, 2018

1076

სააღდგომო ლიტურგიას სამების საკათედრო ტაძარში ესწრებოდნენ აღმასრულებელი და საკანონმდებლო ხელისუფლების, ასევე დიპლომატიური კორპუსის წარმომადგენლები და დედაქალაქის მერი კახა კალაძე.

გიორგი კვირიკაშვილს, პატრიარქმა ქადაგებისას პრემიერ-მინისტრს მრევლისთვის სიტყვით მიმართვა სთხოვა.

„ჩვენ ბედნიერნი ვართ, რომ ჩვენს წირვა-ლოცვას ესწრება მისი აღმატებულება პრემიერ-მინისტრი გიორგი და მე მინდა, ვთხოვო მას, რომ მან მიულოცოს მრევლს აღდგომის დღესასწაული,“ - აღნიშნა უწმინდესმა და უნეტარესმა ილია მეორემ.

პრემიერმა მადლობა გადაუხადა პატრიარქს და სამების ტაძარში შეკრებილ მრევლს და საქართველოს მოქალაქეებს აღდგომის ბრწყინვალე დღესასწაული მიულოცა.

„გილოცავთ ყველას აღდგომის ბრწყინვალე დღესასწაულს. თქვენო უწმინდესობავ, თქვენ გილოცავთ. ღმერთს შევთხოვ, რომ თქვენი მეუფება დიდ ხანს გაგრძელდეს საქართველოში და მინდა, საქართველოს ვუსურვო გამთლიანება.

მინდა, ყველას ვუსურვო ის უდიდესი სიხარული, რომელიც აღდგომის ბრწყინვალე დღესასწაულს მოაქვს. როგორც ეპისტოლეში ბრძანეთ - მინდა, საქართველოს ვუსურვო, რომ როგორც ჭეშმარიტად ეკლესია არის სული ქვეყნის და ერი არის სხეული ქვეყნის, გამთლიანებულიყოს ეს ღვთისგან შექმნილი ჰარმონია, რომელმაც დღემდე მოგვიტანა ჩვენი ქვეყანა. დიდი მადლობა თქვენო უწმინდესობავ ყველაფრისთვის, რაც ჩვენი ქვეყნისთვის გაგიკეთებიათ და ღმერთს შევთხოვ, რომ დიდხანს გაგრძელდეს ეს უდიდესი წყალობა ღვთისა, რასაც თქვენი პატრიარქობა ჰქვია“ - განაცხადა პრემიერმინისტრმა.