თურქეთი მიესალმება კვირიკაშვილის სამშვიდობო ინიციატივას "ნაბიჯი უკეთესი მომავლისაკენ"

პოლიტიკა - 12:05, 07 Apr, 2018

2574

თურქეთის საელჩოს განცხადების თანახმად ანკარა მიესალმება საქართველოს პრემიერ-მინისტრის გიორგი კვირიკაშვილის სამშვიდობო ინიციატივას "ნაბიჯი უკეთესი მომავლისაკენ", რომელიც მიზნად ისახავს აფხაზეთსა და ცხინვალის რეგიონებში მცხოვრები მოსახლეობის ჰუმანიტარული და სოციალურ-ეკონომიკური მდგომარეობის გაუმჯობესებას.

“მივესალმებით საქართველოს მთავრობის სამშვიდობო ინიციატივების ახალ პაკეტს, სახელწოდებით "ნაბიჯი უკეთესი მომავლისაკენ". თურქეთი სრულად უჭერს მხარს საქართველოს ტერიტორიულ მთლიანობასა და სუვერენიტეტს“, - ნათქვამია განცხადებაში.

კვირიკაშვილის ინიციატივა დადებითად უკვე შეაფასეს აშშ-მ, ევროკავშირმა, გერმანიამ თუმცა, იგი მიუღებელი აღმოჩნდა ოკუპირებული ცხინვალის და აფხაზეთისთვის.

ინიციატივა სამ მიმართულებას გულისხმობს:

პირველი მიმართულება ადმინისტრაციული გამყოფი ხაზების გასწვრივ ვაჭრობის გაფართოება და გამარტივება ახალი შესაძლებლობების შექმნის გზით;

მეორე მიმართულება ხარისხიანი განათლების მიღების დამატებითი შესაძლებლობების შექმნა და წვდომის გამარტივება განათლების ყველა საფეხურზე, როგორც ქვეყნის შიგნით, ისე საზღვარგარეთ;

მესამე მიმართულება - ისეთი მექანიზმის შექმნაა, რომლითაც მარტივდება წვდომა იმ სარგებელზე, რომლებიც ქვეყნის განვითარების შედეგად, მათ შორის ევროინტეგრაციის გზაზე ხელმისაწვდომი გახდა - ეს არის უვიზო მიმოსვლის უფლება, თავისუფალი ვაჭრობის უფლება და ა.შ.