"არის დაჯგუფება, რომელიც მართავს პარლამენტს" - "ოცნებაში" დაპირისპრებაზე შალელაშვილიც საუბრობს

პოლიტიკა - 18:30, 05 Apr, 2018

2155

მმართველ გუნდში არსებულ დაპირისპირებაზე უმრავლესობის წევრი, „ქართული ოცნება - მრეწველების“ წევრი შოთა შალელაშვილი ღიად საუბრობს.

"კურიერთან" საუბრისას დეპუტატი აღნიშნავს, რომ გადაწყვეტილებას იღებენ პარლამენტის თავმჯდომარე, მოადგილეები, პარტიის ლიდერები და შემდეგ ეს გადაწყვეტილებები დეპუტატების დონეზე ჩამოდის.

შოთა შალელაშვილი პარლამენტში არსებულ დაჯგუფებაზეც საუბრობს, რომლებიც გადაწყვეტილებას ერთპიროვნულად იღებენ და ამ დაჯგუფების წევრებად კობახიძე-თალაკვაძე-მდინარაძეს ასახელებს.

მისი თქით, „ქართული ოცნების“ ძველი ფორმაციის წარმომადგენლებსა და ახალ სახეებს შორის დაპირისპირება არსებობს და უკმაყოფილება დიდია.

„ბატონი გედევანის უკმაყოფილება არ არის გამოწვეული ერთი რაღაცით, განზოგადოებული თემით, ალბათ, დაგროვილია. ვცდილობთ გუნდის შიგნით, ეს ყველაფერი როგორმე იქნეს აღმოფხვრილი...

მთავარი პრობლემა ის არის „ქართული ოცნების“ გუნდში, რომ უმრავლესობის დეპუტატები უფუნქციოდ დარჩნენ. არის დაჯგუფება, რომელიც მართავს პარლამენტს და რატომღაც გადაწყვეტილებები მიიღება ერთპიროვნულად. ამიტომ, ვფიქრობ, რომ უფრო მეტი კომუნიკაციაა დეპუტატებთან საჭირო და გადანაწილება ფუნქციების, რომ არ იყოს წყენის და განხეთქილების მიზეზი,“ - განაცხადა შალელაშვილმა.