„სუს-ის ანგარიში „პაკაზუხობაა“ - რატომ აკრიტიკებს უშიშროების პოლკოვნიკი სუს-ის ანგარიშს

პოლიტიკა - 13:38, 04 Apr, 2018

1523

სუს-ის მიერ პარლამენტში წარდგენილ 2017 წლის ანგარიშს უსაფრთხოების ექსპერტი, სამხედრო კონტრდაზვერვის ყოფილი მაღლჩინოსანი, თადარიგის პოლკოვნიკი კონსტანტინე ფორჩხიძე ეხმაურება და „ნიუპოსტთან“ საუბრისას“ ამბობს, რომ ყველაფერი ის, რაზეც სუს-ის ანგარიშშია საუბარი, ეროვნული უსაფრთხოების კონცეფციაშია ასახული.

„ეს კონცეპტუალური და გლობალური საკითხებია, რასაც სჭირდება ყოველდღიური რუტინა. სუს-მა უნდა მართოს ოპერატიული ვითარება, აგენტურა და წყაროები. საერთოდ, სპეცსამსახურს აგენტურული აპარატი იმისთის სჭირდება, რომ ქვეყანაში არსებული ოპერატიული ვითარება შეისწავლოს და საფრთხეები განსაზღვროს. ამასთან, სახელმწიფო უსაფრთხოების სამსახურმა უცხო ქვეყნების სპეცსამსახურების ძირგამომთხრალი საქმიანობა დროულად უნდა გამოვლინოს და ამას სპეციალური ანგარიში არ სჭირდება,“ - ამბობს ფორჩხიძე.

ქართველი სპეცსამსახურელის თქმით, სუს-ი ასეთ განცხადებას არ უნდა აკეთდებს.

„ასეთი განცხადებები სახელმწიფო მნიშვნელობის დონეზე უნდა კეთდებოდეს და არა - კონკრეტული სტრუქტურის მიერ, მაგრამ უშიშროების საბჭოს უფუნქციოდ ტოვებენ და ეს ვინ უნდა გააკეთოს? საერთოდ, ანგარიში იმას ნიშნავს, თუ რა გაკეთდა საფრთხეებთან მიმართებაში, მაგალითად, გამოავლინა თუ არა სუს-მა აგენტურა და ამის გამო ქვეყნიდან ვინმე გაძევებული იქნა თუ არა - ეს წმინდა კონტრდაზვერვითი ხაზია, თუმცა ამ ანგარიშში არაფერია ნათქვამი, რა პრევენციული ღონისძიებები გატარდა, რომ მაგალითად, ტერორისტული საფრთხეები ყოფილიყო ნეიტრალიზებული,“ - ამბობს კოტე ფორჩხიძე.

მისივე განმარტებით, სპეცსამსახურის ანგარიში თავდაცვისა და უშიშროების კომიტეტის დახურულ სხდომაზე უნდა იქნას განხილული, რადგან სუს-ის მუშაობაში სპეციფიკური დეტალები, რაც საიდუმლო საქმიანობას ასახვს და არ შეიძლება, ყველაფერი საჯაროდ იყოს გამოფენილი.

„მაგალითად, აშშ-ში მსგავსი ანგარიშების მოსმენა კონგრესისა და სენატის სპეციალურ კომისიებზე ხდება. როცა ანგარიშს აქვეყნებ, ამით უცხო ქვეყნის სპეცსამსახური იგებს, სუსტი წერტილები სად გაქვს და სად ხარ ძლიერი. აქედან გამომდინარე, სახელმწიფოებრივი თვალსაზრისით, ამის გაკეთება აბსოლუტური იდიოტიზმი და „პაკაზუხობაა“. ამ ანგარიშის მიხედვით შესაძლოა, უცხო ქვეყნის სპეცსამსახურმა განსაზღვროს, რა მიმართლებით დასჭირდება აგენტურული მუშაობა, თუ პირდაპირ აქვეყნებ შენს ნამუშევარს, ამ დოკუმენტის მიხედვით უცხო ქვეყანა თავისუფლად განსაზღვრავს, საით გაქვს მიმართული ძალები და აღარ დასჭირდება ზედმეტი სადაზვერვო მოქმედებების განხორციელება იმისათვის, რომ შენთან შემოაღწიოს,“ - განმარტავს ფორჩხიძე.

უსაფრთხოების ექსპერტი „ნიუპოსტთან“ იმასაც ამბობს, რომ დოკუმენტები, რომლებიც ქვეყანაში ოპერატიულ ვითარებას ეხება, დახურულ საპარლამენტო სხდომებზე უნდა განიხილებოდეს და მას გრიფით „საიდუმლო“ უნდა ედოს.