უცხო ქვეყნების აგენტურა საქართველოში ანტიდასავლურ განწყობებს აღვივებს და რელიგიურ ნიადაგზე დესტაბილიზაციის შექმნას ცდილობს

უცხო ქვეყნების აგენტურა საქართველოში ანტიდასავლურ განწყობებს აღვივებს და რელიგიურ ნიადაგზე დესტაბილიზაციის შექმნას ცდილობს - სუს-ის ანგარიში

პოლიტიკა - 10:44, 04 Apr, 2018

1841

სახელწმიფო უსაფრთხოების სამსახურის მონაცემებით, საქართველოში უცხო ქვეყნის სადაზვერვო სამსახურები, სხვადასხვა საქმიანობის საფარქვეშ, (დიპლომატიური, კულტურული, ჰუმანიტარული, რელიგიური, კომერციული და სხვა), მუდმივად ცდილობენ, შეაღწიონ ხელისუფლების ორგანოებსა და ქვეყნის უსაფრთხოების სტრუქტურებში, მოიპოვონ მათთვის სასურველი/საიდუმლო ინფორმაცია, შექმნან და გააფართოონ ჯაშუშური ქსელი.

სუს-ის 2017 წლის ანგარიშში, რომელიც პარლამენტს წარედგინა, ასევე, აღნიშნულია, უცხოური სადაზვერვო სამსახურების მიზანია, გავლენა მოახდინონ ქვეყნის პოლიტიკურ, სოციალურ, სამხედრო და ეკონომიკურ პროცესებზე.

„კონტრდაზვერვითი საქმიანობის შედეგად მოპოვებული ინფორმაციის ანალიზი ცხადყოფს, რომ საქართველოში უცხო ქვეყნების სპეცსამსახურების ძირითადი ამოცანებია: ქართულ საზოგადოებაში ანტიდასავლური განწყობების გაღვივება; საერთაშორისო დონეზე საქართველოს, როგორც საიმედო პარტნიორის იმიჯის შელახვა; საზოგადოებაში უნდობლობის, გაურკვევლობის, უიმედობისა და ნიჰილიზმის გაჩენა; ეთნიკურ და რელიგიურ ნიადაგზე დესტაბილიზაციის კერების შექმნა, რათა ქვეყანაში განვითარდეს დეზინტეგრაციული პროცესები და მოხდეს ქართული საზოგადოების პოლარიზაცია, - ნათქვამია ანგარიშში.

ამავე ანგარიშიდან ირკვევა, რომ სახელმწიფო უსაფრთხოების სამსახური კონტრდაზვერვით საქმიანობას წარმართავდა კანონით გათვალისწინებული კომპეტენციის ფარგლებში და ახორციელებდა უცხო ქვეყნების სპეცსამსახურების დაინტერესების სფეროების გამოვლენას, კონტრზომების გატარებას, არსებული საფრთხეების შესახებ შესაბამისი უწყებებისა და პირების წინმსწრებ ინფორმირებას, სახელმწიფო საიდუმლოებისა და სახელმწიფო უსაფრთხოების რეჟიმის დაცვას, საქართველოს შეიარაღებული ძალების კონტრდაზვერვით უზრუნველყოფას.

„184 ორგანიზაციაში განხორციელდა სახელმწიფო საიდუმლოებასთან სახელმწიფო ორგანოს/იურიდიული პირის დაშვების მისაღებად საიდუმლოების დაცვის რეჟიმისა და საიდუმლო საქმის წარმოების კომისიური შემოწმება.

სახელმწიფო საიდუმლოებასთან ინდივიდუალური დაშვების მსურველ
შვიდი ათასამდე ფიზიკურ პირზე განხორციელდა შემოწმების პროცედურა. 900-მდე პირზე განისაზღვრა ნატო-ს კლასიფიცირებულ ინფორმაციასთან დაშვების მიზანშეწონილობის საკითხი; 500-ზე მეტ პირს სხვადასხვა ორგანიზაცია-დაწესებულებიდან გაეწია მეთოდურ-ორგანიზაციული დახმარება საიდუმლო საქმის წარმოებისა და საიდუმლოების რეჟიმის დაცვის კუთხით“, – ნათქვამია სუს-ის ანგარიშში.