საკუთრების უფლების ქსენოფობია - "სამართლიანი არჩევნები" საკონსტიტუციო ცვლილებებს აკრიტიკებს

პოლიტიკა - 10:45, 04 Apr, 2018

1096

საკონსტიტუციო ცვლილებებს, რომელიც უცხოელებზე მიწის გასხვისების აკრძალვას ეხება, "სამართლიანი არჩევნები" აკრიტიკებს. არასამთავრობო ორგანიზაცია გასული წლის სექტემბერში მიღებული გადაწყვეტილების გამო პარლამენტს ხელისუფლების დანაწილების პრინციპის დარღვევასა და "რადიკალური დაჯგუფებების" დაკვეთის შესრულებაში ადანაშაულებს. "სამართლიან არჩევნებში" ამბობენ, რომ ახალი კანონის მიხედვით სასოფლო-სამეურნეო მიწის გასხვისება უცხოელებზე მაინც იქნება შესაძლებელი, თუმცა მხოლოდ სახელმწიფოს მხრიდან, რაც კორუფციის რისკებს მნიშვნელოვნად ზრდის.

როგორც ორგანიზაციის პოლიტიკური მკვლევარის ანა ჭიბრიშვილის მიერ მომზადებულ პოლიტიკის დოკუმენტშია ნათქვამი, ხელისუფლებამ კონსტიტუციით სასოფლო-სამეურნეო მიწების უცხოელებზე გაყიდვის აკრძალვით, ერთი შეხედვით, საბოლოოდ გადაწყვიტა „ქართული მიწის“ გარშემო მრავალწლიანი სპეკულირება. თუმცა, ამგვარი მოწესრიგება რიგითი მოქალაქის უფლებებს შეზღუდავს და მხოლოდ რადიკალური დაჯგუფებების ფსევდოინტერესებს მოემსახურება.

სახელმწიფო კვლავ შეძლებს მიწების მისთვის მოსაწონ უცხოელზე გასხვისებას, რაც კორუფციული გარიგებებით შეიძლება იყოს მოტივირებული. სახელმწიფოს გრძელვადიან პერსპექტივაში, აუცილებლად მოუწევს პოლიტიკის ცვლილება, განსაკუთრებით, მაშინ, თუკი ქვეყანა განაგრძობს ევროკავშირთან დაახლოვების და მასში გაწევრიანების თანმიმდევრულ პოლიტიკას.