ბათუმის პორტის თანამშრომლებს საზღვაო ნავსადგომის ბლოკირებაში ადანაშაულებენ - გემისთვის გზის გადაკეტვის ფაქტზე გამოძიება დაიწყო

პოლიტიკა - 09:34, 04 Apr, 2018

1163

ბათუმის პორტის შენობაში მთელი ღამის განმავლობაში სართალდამცველები იყვნენ მობილიზებული. შინაგან საქმეთა სამინისტროს ინფორმაციით, პოლიცია ადგილზე ადმინისტრაციის გამოძახების საფუძველზე მივიდა.

პორტის ადმინისტრაციის ინფორმაციით, პორტში გემი ვერ შევიდა, რადგან თანამშრომელთა ნაწილმა, მცირე ზომის ხომალდებით, ხელოვნურად ჩახერგა ზღვით შესასვლელი.

ფაქტზე შინაგან საქმეთა სამინისტრომ გამოძიება 222-ე პრიმა მუხლის 1 ნაწილით დაიწყო, რაც სატრანსპორტო კომუნიკაციების ბლოკირებას გულისხმობს.

გაფიცულები კი ირწმუნებიან, რომ სხვა თანამშრომლები სოლიდარობას უცხადებენ. "ბლოკირებას ადგილი ჰქონდა თუ არა ამას გამოძიება დაადგენს. ის, რაც ნავსადგურის ფლოტის მცურავი ერთეულის კაპიტნებმა გააკეთეს იყო სოლიდარობის გამოხატვა. ეს არის ნავსადგურის თანამშრომლების საერთო გაფიცვა, ვერ გახდებოდა შესაძლებელი გემის გაყვანა, შემოყვანა, დაცლა და დატვირთვა იმიტომ, რომ ამ პროცესში მონაწილეობს ნავსადგურის თანამშრომლები, რომლებიც სოლიდარობის ნიშნად აქციას აწყობენ. შეგნებულად გემის შემოყვანას ხელს არავინ უშლის" - აცხადებენ აქციის მონაწილეები.

ბათუმში, პორტის თანამშრომლები მესამე დღეა გაიფიცნენ. ისინი პორტის დირექტორის გადადგომას და რეორგანიზაციის შეჩერებას ითხოვდნენ.

პორტის დირექტორმა განაცხადა, რომ პორტში რეორგანიზაცია დროებით შეჩერდება.