"გვაქვს ეჭვი, რომ „RMG Gold“ შემოჭრილია ჩვენს ტერიტორიაზე" - ოპოზიცია დმანისში იმ ტერიტორიის ნახვას გეგმავს, რომელიც აუქციონზე იჯარით აიღეს

პოლიტიკა - 10:07, 03 Apr, 2018

1274

გაერთიანებულ ოპოზიციას ეჭვი აქვს რომ მათ მიერ დმანისში იჯარით აღებულ ტერიტორიაზე „RMG Gold“-ია შეჭრილი და მას უკანონოდ იყენებს. ოპოზიციის წარმომადგენლები ადგილზე ჩასვლას და ტერიტორიის ნახვას გეგმავენ.

„ერთიანი ნაციონალური მოძრაობის“ ერთ-ერთი ლიდერის ნიკა მელიას თქმით ისინი ადგილზე დამოუკიდებელი ამზომველების მიყვანას და ტერიტორიის საზღვრების ზუსტად დადგენას აპირებენ:

„აუცილებლობა მოითხოვს , რომ დამოუკიდებელი ამზომველები ავიყვანოთ, რომლებიც დაადგენენ ზუსტად სად არის ეს 16 ჰა. გვაქვს სანდო წყაროდან ინფორმაცია, რომ ამ 16 ჰექტარს „RMG Gold“ წლების განმავლობაში უკანონოდ გამოიყენებდა. თუ დადასტურდა ეს ცალკე სისხლის სამართლის დანაშაულია. ჩვენ უკვე სამართლებრივი სტატუსის მატარებელი ვართ და გვაინტერესებს ყველა დეტალი, რომელიც არის ირიბად ან პირდაპირ დაკავშირებული ამ ტერიტორიასთან.“- განაცხადა ნიკა მელიამ.

„ახალი საქართველოს“ წევრის თქმით, იმის მიუხედავად, რომ მათ არაერთი წერილი მიწერეს შესაბამის უწყებებს, რათა დაედგინათ, ზუსტად რა ტერიტორია შედის მათ მფლობელობაში პასუხი არ მიუღიათ.თამთა შამათავას თქმით, აღნიშნული ტერიტორიის მფლობელები ეჭვობენ , რომ „RMG Gold“ შემოჭრილია მათ კუთვნილ მიწის ნაკვეთზე.

„ძალიან ბევრი წერილი მივწერეთ სხვადასხვა უწყებას, მაგრამ პასუხი არ მოგვსვლია. უნდა ვიცოდეთ ზუსტად რა მიწა მოვიგეთ აუქციონზე და რამდენად არის დაცული ის ქონებრივად და უფლებრივად. გვაქვს გონივრული ეჭვი რომ „RMG Gold“ შემოჭრილია ჩვენს ტერიტორიაზე“-განაცხადა თამთა შამათავამ.