სახალხო დამცველი „მაუწყებლობის შესახებ“ საქართველოს კანონსა და „სახელმწიფო შესყიდვების შესახებ“ საქართველოს კანონში განხორციელებული ცვლილებებს უარყოფითად აფასებს, - ამის შესახებ საუბარია ომბუდსმენის 2017 წლის ანგარიშში.

„საანგარიშო პერიოდში მნიშვნელოვანი კრიტიკა გამოიწვია საზოგადოებრივი მაუწყებლის გარშემო ახალი ხელმძღვანელობის პირობებში მიმდინარე მოვლენებმა. მათ შორის, სახალხო დამცველმა უარყოფითად შეაფასა მენეჯმენტის მიერ 2017 წლის დასაწყისში წარმოდგენილი ხედვა, რომელიც გადაცემების დახურვას მხოლოდ მათ რეიტინგს უკავშირებდა. უარყოფითად უნდა შეფასდეს „მაუწყებლობის შესახებ“ საქართველოს კანონსა და „სახელმწიფო შესყიდვების შესახებ“ საქართველოს კანონში განხორციელებული ცვლილებები. კერძოდ, ახალი საკანონმდებლო რეგულირების ფარგლებში, საზოგადოებრივი მაუწყებლის მიერ განხორციელებულ მთელ რიგ შესყიდვებზე აღარ ვრცელდება „სახელმწიფო შესყიდვების შესახებ“ საქართველოს კანონი. შედეგად, მოცემულ ეტაპზე დაწესებულების მიერ განხორციელებული შესყიდვები საკანონმდებლო მოწესრიგების ფარგლებს გარეთ რჩება, რაც მნიშვნელოვან შეკითხვებს აჩენს მისი საქმიანობის გამჭვირვალობასთან დაკავშირებით. აგრეთვე მნიშვნელოვანია, რომ ახალი საკანონმდებლო ჩარჩო საზოგადოებრივ მაუწყებელს ანიჭებს უფლებამოსილებას, კანონმდებლობით განსაზღვრული შემოსავლები დამწყები საწარმოების (სტარტაპების) წახალისებისკენ მიმართოს, რაც, მსგავსი საწარმოების საქმიანობასთან დაკავშირებული რისკების გათვალისწინებით, ბიუჯეტის მიზნობრივად ხარჯვის საკითხს ეჭვქვეშ აყენებს. ამასთან, საზოგადოებრივ მაუწყებელს მიეცა კომერციული რეკლამის განთავსების შესაძლებლობა, რაც ეწინააღმდეგება კანონმდებლობით დადგენილ საზოგადოებრივი მაუწყებლობის პრინციპს, რომლის თანახმადაც საზოგადოებრივი მაუწყებელი თავისუფალია კომერციული გავლენისგან. საანგარიშო პერიოდში განხორციელებული მონიტორინგის შედეგად, აგრეთვე გამოიკვეთა საზოგადოებრივ მაუწყებელში შრომითი უფლებების რეალიზების კუთხით არსებული სხვადასხვა სახის პრობლემა, რაც უკავშირდებოდა ობიექტური გარემოებების გარეშე მოკლევადიანი ხელშეკრულებების გაფორმებას, თანამშრომელთა სამსახურში უკონკურსოდ აყვანას, დისკრიმინაციული საფუძვლით თანამშრომლის გათავისუფლებას.“- აღნიშნულია ანგარიშში.