„აქ დანაშაული მოხდა“ - რატომ შეწყდა აქცია და რატომ შეუშვეს აქციის მონაწილეებმა სპეცტექნიკა მესტიაში

პოლიტიკა - 11:56, 02 Apr, 2018

2925

აქციის მონაწილეებმა, რომლებიც მესტიაში ჰესების მშენებლობას აპროტესტებენ, ცემენტით დატვირთული სპეციალური ტექნიკა გაატარეს. რატომ წავდნენ კომპრომისზე აქციის მონაწილეები და შედგა თუ არა ხელისუფლების წარმომადგენლებთან გარკვეული გარიგება? - ამის გარკვევას „ნიუპოსტი“ აქციის ერთ-ერთ ორგანიზატორთან, დავით გულბანთან შეეცადა.

გულბანი აცხადებს, რომ გადაწყვეტილება მას შემდეგ მიიღს, რაც მესტიაში შს მინისტრის მოადგილე კახაბერ საბანაძე ჩავიდა.

შს მაღალჩინოსანთან კონსულტაციის შემდეგ კი სპეცტექნიკამ, რომელიც აქციის მონაწილეებს აქამდე ბლოკირებული ჰქონდათ, მშენებლობის ადგილზე ცემენტი შეიტანა.

გულბანი „ნიუპოსტთან“ საუბრისას აღნიშნავს, რომ ჰესების მშენებელი კომპანია სამუშაოებს მოსახლეობის ნებართვის გარეშე ვერ დაიწყებს და თუ ეს მათი ნების საწინააღმდეგოდ მოხდება, ფართომასშტაბიანი აქციები კვლავ გაიმართება.

„სულ სხვა ვითარება იყო, ადგილზე შს მინისტრის მოადგილე, საბანაძე იყო ჩამობრძანებული, რომელიც მესტიაში საქმეში გასარკვევად ჩამოვიდა, მას პოლიციის ესკორტი აცილებდა, 100 მეტი ადამიანი, დაახლოებით 15-მდე „პიკაპი“ და პლუს, ავტობუსი. სასულიერო პირებიც ჩაერივნებ და საბოლოოდ, შევთანხმდით, რომ სამუშაოების გაგრძლება არ მოხდება, ტექნიკა ადგილზე შევა, მასალას დატოებს და ტერიტორიას მალევე დატოვებენ, მუშა პერსონალიც გამოვა ადგილიდან. სანამ დოკუმენტის საფუძვლიანი განხილვა და შესწავლა არ მოხდება, მანამდე სამუშაოები არ გაგრძელდება“- აღნიშნა დავით გულბანმა.

აქციის ორგანიზატორი ირწუნება, რომ აქციის მონაწილეებს, რომლებმაც ტექნიკა გაატარეს, კონკრეტული ადამიანების ინტერესი არ შეუსრულებიათ.

„ჩვენებიც იმყოფებიან ტერიტორიაზე, ისინი ყველაფერს აკონტროლებენ... პრინციპის დათმობაზე საუბარი არ არის, მასალა საკონსერვაციო სამუშაოებისთვის მაინც საჭირო იყო. ჩვენ ზუსტად ვიცით, რომ აქ დანაშაული მოხდა, იმ თვალსაზრისით, რომ დოკუმენტები გაყალბდა და ასეთი, გაყალბებული დოკუმენტაცია სახელმწიფო ინსტიტუციამ, უბრალოდ, გაატარა და დაამტკიცა. ჩვენ ბრძოლას ვაგრძელებთ, მივმართავთ შესაბამის ორგანოს და მედიაც ინფორმირებული იქნება,“ - თქვა აქციის ერთ-ერთმა ორგანიზატორმა.

ცნობისთვის, მესტიაში ადგილობრივებმა პროტესტის ნიშნად გზა გადაკეტეს და ორი დღის განმავლობაში სპეციალური ტექნიკა, რომელიც ცემენტით არის დატვირთული, მშენებარე ჰესის ტერიტორიაზე არ შეუშვეს.