"კვირიკაშვილმა სიბრიყვე ჩაიდინა, რისი ალოკვაც დაგვჭირდა"- ხუხაშვილი რუსი დიპლომატის გაძევებასა და უცნაურ სოლიდარობაზე

პოლიტიკა - 15:38, 29 Mar, 2018

5692

დიდ ბრიტანეთს სოლიდარობას საქართველოს საგარეო საქმეთა სამინისტროც უცხადებს და საქართველოში შვეიცარიის კონფედერაციის საელჩოს რუსეთის ინტერესების სექციის თანამშრომელს ქვეყნიდან აძევებს.

ექსპერტი გია ხუხაშვილის „ნიუპოსტთან“ საუბრისას აცხადებს, რომ საქართველოს ხელისუფლების აღნიშნული გადაწყვეტილება არის ლოგიკური სოლიდარობა და მისი გუშინელი ჟენევის მოლაპარაკებების უშედეგოდ დასრულებასთან დაკავშირება საბაბი იქნება ვიდრე რეალური მიზეზი:

„ეს არის სოლიდარობა და ეს ლოგიკური იყო. ჩვენ დიპლომატიური ურთიერთობა არ გვაქვს და აქედან გამომდინარე უცნაური სოლიდარობა გამოდის. ის არ იყო საელჩოს თანამშრომელი, ის იყო საკონსულოს თანამშრომელი, რომელიც წმინდა ტექნიკურ საკონსულო საქმიანობას ახორციელებდა, მაგრამ რადგან ჩვენ ვექტორი გვაქვს გამოცხადებული და ვხედავთ დასავლეთში რა ტიპის კონსოლიდირებული გადაწყვეტილებები მიიღება, ამას ავუწყვეთ ფეხი.

რაც შეეხება ჟენევის მოლაპარაკებებთან ამის დაკავშირებას, ეს უფრო საბაბია, ვიდრე რეალური მიზეზი. კვირიკაშვილმა რამდენიმე კვირის წინ, შენი მუხლების ჭირიმეო, წერილი მისწერა, ჟენევის მოლაპარაკებებზე ზუსტად ეს წერილი გახდა პრობლემა, რის ირგვლივაც დაიწყეს რუსებმა შემოტევა და ფაქტობრივად ქართულ მხარეს მოუწია თავისი პრემიერმინისტრის ამ ძალიან უცნაური გზავნილების დენონსირება. ახლა კი კვირიკაშვილმა უნდა იცოდეს, რომ წერილის წამღები რუსეთში აღარავინ დარჩა საქართველოში, ასე რომ თუ რამის გაგზავნა მოუნდა, თვითონ უნდა წაიღოს წერილი, ამის დრო დადგა უკვე. რუსებმა როგორც მოსალოდნელი იყო, ჩვენს დელეგაციას ააფარეს თვალებზე კვირიკაშვილის წერილი. ეს იყო ის სიბრიყვე რაც კვირიკაშვილმა ჩაიდინა და რისი ალოკვაც დაგვჭირდა ასეთ უცნაურ ფორმატში“, - აღნიშნავს გია ხუხაშვილი.