„საქართველო ძალის გამოუყენებლობის შეთანხმების ინტერპრეტაციას ახდენს“ - აფხაზეთის საოკუპაციო რეჟიმის ე.წ საგარეო უწყება

პოლიტიკა - 13:03, 29 Mar, 2018

1950

ოკუპირებული აფხაზეთის ე.წ საგარეო საქმეთა მინისტრის დაურ კოვეს თქმით, ქართული მხარე თავისებურად ახდენს იმ შეთანხმების ინტერპრეტირებას, რომლის ბაზაზეც ჟენევის დისკუსიები ფუნქციონირებს. ამის შესახებ კოვემ ჟენევის დისკუსიების ფარგლებში საერთო დოკუმენტის ვერმიღების მიზეზებზე საუბრისას განაცხადა.

„ქართული მხარე დაჟინებით მოითხოვს, რომ ერთობლივი ზეპირი განცხადება, შემდგომში კი უკვე შეთანხმება, რომლებიც უნდა შემუშავდეს, მიღებული უნდა იქნეს საქართველოსა და რუსეთს შორის. ჩვენი პოზიცია კარდინალურად განსხვავებულია, ჩვენ არ ვთვლით, რომ შეთანხმებას ხელი რუსეთმა, როგორც კონფლიქტის მხარემ უნდა მოაწეროს.“- განაცხადა კოვემ.

კოვეს თქმით, „ ძალის გამოუყენებლობასთან დაკავშირებით ერთობლივი ზეპირი განცხადების მიღება და შეთანხმებაზე ხელმოწერა, აფხაზეთისა და სამხრეთ ოსეთის მონაწილეობის გარეშე, არანაირ შედეგს არ მოიტანს და შეუძლებელიცაა“. ე.წ მინისტრი თვლის რომ „კონფლიქტი საქართველოსა და აფხაზეთს შორის და საქართველოსა და სამხრეთ ოპსეთს შორის იყო“

„შესაბამისად, შეთანხმება და ზეპირი განცხადება უნდა შედგეს აფხაზეთსა და საქართველოს, საქართველოსა და სამხრეთ ოსეთს შორის.. სწორედ ეს იქცა კიდევ ერთხელ დაბრკოლებად. წინა რაუნდებზე, როდესაც ჩვენ განვიხილავდით ერთობლივი ზეპირი განცხადების ტექსტებს, ამის დაკონკრეტება არ მომხდარა და როგორც ჩანს თითოეულმა მხარემ თავისებურად გაიგო, სწორედ ამის დემონსტრაცია მოახდინა საქართველომ“- განაცხადა კოვემ.