„RMG ჯგუფი“ 60 მილიონიან სკანდალში ეხვევა

პოლიტიკა - 13:59, 29 Mar, 2018

2729

საზოგადოებრივი გაერთიანება „საყდრისის კომიტეტი კულტურული მემკვიდრეობისთვის“ სკანდალურ ინფორმაციას ავრცელებს, რომლის მიხედვითაც „RMG ჯგუფი“ 60 მილიონიან სკანდალში ეხვევა.

„RMG ჯგუფის“ პარტნიორი კომპანიის მიერ 2018 წლის 15 მარტს ლონდონის საფონდო ბირჟაზე გაკეთდა განცხადება შესაბამის სალიცენზიო ტერიტორიაზე კვლევა-ძიებითი სამუშაოების გაგრძელების შესახებ. „საყდრისის კომიტეტი“ დაინტერესდა აღნიშნული საკითხით, რის შედეგადაც გამოიკვეთა, რომ „RMG ჯგუფში“ შემავალი კომპანიების - „კავკასიის სამთო ჯგუფის“ და „ჯორჯიან კოპერ ენდ გოლდის“ მხრიდან ადგილი აქვს სალიცენზიო პირობების უხეშ დარღვევას, რამაც ქვეყნის ბიუჯეტი 60 მილიონი ლარით აზარალა.

როგორც „საყდრისის კომიტეტში“ აცხადებენ, არსებობს საფუძვლიანი ვარაუდი, ეკონომიკის სამინისტროსა და „RMG ჯგუფს“ შორის კორუფციულ გარიგებასთან დაკავშირებით. ამ ფაქტს ამყარებს ოფიციალური დოკუმენტები და მთავრობის სხდომებსა თუ ეკონომიკის სამინისტროს მიერ მიღებული ბოლოდროინდელი გადაწყვეტილებები, რაც „RMG ჯგუფს“ სასათბურე პირობებს უქმნის

„საყდრისის კომიტეტი“ მოუწოდებს ეკონომიკის სამინისტროს საჯარო განმარტებები გააკეთოს აღნიშნულ საკითხთან დაკავშირებით.

„საყდრისის კომიტეტი“ ასევე მოუწოდებს საქართველოს პარლამენტს, „RMG ჯგუფის“ საქმიანობის შესახებ 2018 წლის 3 აპრილს უკვე ჩანიშნულ გარემოსა და ბუნებრივი რესურსების დაცვის კომიტეტის სხდომაზე მოითხოვოს განმარტებები ზემოაღნიშნულ საკითხებთან დაკავშირებით ეკონომიკის სამინისტროსა და შესაბამისი აღმასრულებელი ხელისუფლების წარმომადგენლებისგან.