თბილისის საკრებულოს ფრაქციის „ერთიანი ნაციონალური მოძრაობა“ წევრის ლევან ხაბეიშვილის განცხადებით, დედაქალაქის მერმა კახა კალაძემ და საპარლამენტო უმრავლესობის ლიდერმა არჩილ თალაკვაძემ საკრებულოს ოპოზიცია პარლამენტში მიმდინარე დედაქალაქის მიწათსარგებლობის გენერალური გეგმის განხილვაზე არ დაპატიჟა. განცხადება ამის შესახებ ლევან ხაბეიშვილმა საკრებულოში გამართულ ბრიფინგზე გააკეთა.

საკრებულოს წევრი, მოუწოდებს დედაქალაქის მერს და უმრავლესობის ლიდერს გასაჯაროვდეს თუ რა ფორმით გაიგზავნა მოსაწვევი ან საზოგადოებას ბოდიში მოუხადონ.

„დედაქალაქის მერმა და ამხანაგმა თალაკვაძემ დღეს კიდევ ერთხელ იცრუეს, მაშინ როდესაც განაცხადეს, რომ საკრებულოს ოპოზიცია ჰყავდათ მიწვეული გენგეგმის დღევანდელ განხილვაზე. ეს არის ტყუილი, ამხანაგ თალაკვაძეს და ამხანაგ კალაძეს მოვუწოდებთ ან გაასაჯაროონ თუ რა ფორმით გამოგვიგზავნეს მოწვევა ანდა საზოგადოებას მოუხადონ ბოდიში რადგან მათ ფაქტობრივად, როგორც კომპარტიამ, ყაზარმულ რეჟიმში ჩაატარეს გენერალური გეგმის განხილვა. ხვალ, ვმონაწილეობთ „სითი ინსტიტუტის“ მიერ დაგეგმილ შეხვედრაში სადაც ასევე იქნება განხილვა. თბილისელების სასიკეთოდ ჩვენ ყველა საქმიან შეხვედრაში მონაწილეობის მისაღებად მზად ვართ“- განაცხადა ლევან ხაბეიშვილმა,