ვითარება ბორჯომში - საკრებულოში პოლიციაა მობილიზებული, დეპუტატების ნაწილი კი სხდომას ბოიკოტს უცხადებს

პოლიტიკა - 12:02, 28 Mar, 2018

1499

ბორჯომის საკრებულო სხდომისთვის ემზადება. დღევანდელ სხდომაზე საკრებულოს თავმჯდომარის იმპიჩმენტის საკითხი უნდა დადგეს. სხდომა 12:00 საათზეა ჩანიშნული.

ბორჯომის საკრებულოს შენობის გარეთ მობილიზებულია საპატრულო პოლიცია. სამართალდამცველების გაძლიერებული მობილიზაციაა საკრებულოს შენობაშიც.

ბორჯომის მუნიციპალიტეტის საკრებულოს სხდომას ბოიკოტს უცხადებს დეპუტეტების ნაწილი. სხდომას არ დაესწრებიან "ევროპული საქართველოს", "ნაციონალური მოძრაობის", "ლეიბორისტული პარტიის" დეპუტეტები.

დაუზუსტებელი ინფორმაციით სხდომაზე დასწრებას არ გეგმევს "საქართველოს პატრიოტთა ალიანსის" რამდენიმე წევრიც.

ამ დროისთვის შემობაში არ იმყოფება საკრებულოს თავმჯდომარე ზაზა ჩაჩანიძე, ადგილზეა "ქართული ოცნების" დეპუტეტთა სრული შემადგენლობა.

შეგახსენებთ, დაპირისპირება ბორჯომის საკრებულოში 20 ნოემბრიდან დაიწყო და დღემდე გრძელდება. საკრებულოს ბოიკოტი გამოუცხადა „ქართული ოცნების“ 13-მა დეპუტატმა და სხდომებს არ ესწრებოდა. შემდეგ დაპირისპირება საკრებულოს ფრაქციების შექმნას და მერიის თანამშრომელთა ხელფასების გაზრდის საკითხს მოჰყვა. 28 თებერვლის საკრებულოს სხდომაზე კონფლიქტი ფიზიკურ დაპირისპირებაში გადაიზარდა. დეპუტატებმა საკრებულოს თავმჯდომარის იმპიჩმენტის მოთხოვნაც დააყენეს.

ზაზა ჩაჩანიძე „პატრიოტთა ალიანსის“ წევრია, როგორც ცნობილია, მის იმპიჩმენტს მხარს „ქართული ოცნების“ დეპუტაცია უჭერს, თუმცა გადაყენებისთვის საკმარისი ხმები ვერ გროვდება. ოპოზიციისა და თავმჯდომარის ინფორმაციით, ჩაჩანიძის წინააღმდეგ ხმის მიცემას საკუთარი თანაპარტიელებიც აპირებენ.

_{ფოტო borjomi.tv}