„ჰქონდათ დებოშის მოწყობის მცდელობა ვიწროპარტიული ინტერესის გასატარებლად"

„ჰქონდათ დებოშის მოწყობის მცდელობა ვიწროპარტიული ინტერესის გასატარებლად" - კალაძე ინციდენტის შესახებ

პოლიტიკა - 11:31, 28 Mar, 2018

1302

დედაქალაქის მერი კახა კალაძე კომპანია „სითი ინსტიტუტის“ მიერ მერიის მისამართით გამოთქმულ ბრალდებებს უსაფუძვლოსა და გაუგებარს უწოდებს.

კახა კალაძე დედაქალაქის მთავრობის დღევანდელ სხდომაზე თბილისის მიწათსარგებლობის გენერალური გეგმის საბოლოო ვერსიის საჯარო განხილვაზე განვითარებულ მოვლენებს გამოეხმაურა და აღნიშნა, რომ შეხვედრაზე პოლიტიკოსების დასწრება მისი გადაწყვეტილება იყო.

„ფაქტია, რომ ზოგიერთი პოლიტიკოსი ვერ აღიქვამს ზღვარს ვიწროპარტიულ ინტერესებსა და ქალაქის განვითარებას შორის. პრეზენტაციაზე პოლიტიკოსების მოწვევა ჩემი გადაწყვეტილება იყო. ისინი წინასაარჩევნო პერიოდში ჩემი კონკურენტები იყვნენ და მინდოდა, რომ ქალაქისთვის მნიშვნელოვანი დოკუმენტის განხილვაში მონაწილეობა მიეღოთ, თუმცა მათ ამჯობინეს, რომ თავიანთი ვიწროპარტიული ინტერესი გაეტარებინათ. ჰქონდათ დებოშის მოწყობის მცდელობა, მაგრამ რა თქმა უნდა, ჩვენ ამის შესაძლებლობა არ მივეცით და შეხვედრა ჩვეულ რეჟიმში გაგრძელდა“, - განაცხადა კახა კალაძემ.

მისივე თქმით, გენგეგმის საბოლოო ვერსიის საჯარო განხილვას არასამთავრობო ორგანიზაციების წარმომადგენლები, ასევე, არქიტექტორები და ურბანისტები ესწრებოდნენ, რომელთაც თავიანთ საქმიანობაში დიდი გამოცდილება აქვთ.

„რადგან ამ დოკუმენტის არსებობას უდიდეს მნიშვნელობას ვანიჭებთ, გვინდოდა, რომ მათ თავიანთი მოსაზრებები დაეფიქსირებინათ და შენიშვნები გამოეთქვათ, თუმცა ამის შესაძლებლობა არ მიეცათ, რადგან პოლიტიკოსები შეეცადნენ, შეხვედრა პოლიტიკურ ჭრილში გადაეტანათ“, - აღნიშნა თბილისის მერმა.

კახა კალაძე ასევე, „სითი ინსტიტუტის“ წარმომადგენლების მიერ გაკეთებულ განცხადებებს გამოეხმაურა და აღნიშნა, რომ მერიის მხრიდან კომპანიის წარმომადგენლებთან კომუნიკაცია არაერთხელ შედგა.

„სიცრუეა, თითქოს ჩვენი მხრიდან კომუნიკაცია არ იყო. პირადად მე, რამდენჯერმე შევხვდი ამ კომპანიის წარმომადგენლებს. ფაქტობრივად, ყოველდღიურ რეჟიმში მიდიოდა კომუნიკაცია. ძალიან გულდასაწყვეტია ის ცინიკური, შეურაცხმყოფელი დამოკიდებულება, რომელიც „სითი ინსტიტუტის“ ერთ-ერთი წარმომადგენლისგან მერიის თანამშრომლების მიმართ დაფიქსირდა. ჩვენი მხრიდან არცერთი შეურაცხმყოფელი განცხადება და სიტყვა არ ყოფილა და ასეც იქნება. მიუხედავად იმისა, რომ დოკუმენტში უამრავი ხარვეზი არსებობს, კონსტრუქციულად ვიქცევით. ამიტომ, მერიის ახალგაზრდა თანამშრომლების მიმართ, რომლებიც ჩვენი ქალაქის მომავალს წარმოადგენენ, მსგავს დამოკიდებულებას არავის ვაპატიებთ“, - აღნიშნა დედაქალაქის მერმა.