"სამასწლოვანმა ხემ გაუძლო ყველა ხელისუფლებას, უამრავ შემოსევას და ის გაუძლებს იმ ერთ ადამიანსაც"- კორძაია

პოლიტიკა - 19:05, 27 Mar, 2018

1486

„რესპუბლიკური პარტიის“ ერთ-ერთი ლიდერის თამარ კორძაიას შეფასებით, მიზანი მიღწეულია და ბიძინა ივანიშვილი ვეღარ მოახერხებს აჭარიდან კიდევ ერთი ხის გადატანას. აღნიშნული განცხადება, კორძაიამ დღეს ევკალიპტის ხეზე გამოცხადებული აუქციონის დასრულების შემდეგ გააკეთა, რომელზეც გამარჯვება ოპოზიციას დარჩა.

„მიზანი მიღწეულია, ხის გადარგვა ვერ მოხდება კონკრეტული ადამიანის მიერ. ჩვენ გვინდა რომ ეს ხე იყოს ადგილობრივი მოსახლეობის და ეს ასე იქნება. ვთვლით რომ ხე უნდა იყოს იქ, იმიტომ რომ სამასწლოვანმა ხემ გაუძლო ყველა ხელისუფლებას, უამრავ შემოსევას და ის გაუძლებს იმ ერთ ადამიანსაც. ხე ფასი სიმბოლურად დაჯდა 20020 ლარი და ეს სიმბოლურად უკავშირდება იმასაც, რომ ჩვენ ასევე პრინციპულად მივიღებთ შედეგებს 2020 წლის არჩევნებში.“- განაცხადა თამარ კორძაიამ.

შეგახსენებთ, 300 წლის ევკალიპტის ხეზე გამოცხადებული აუქციონი ოპოზიციის გამარჯვებით დასრულდა. ოპოზიცია ვარაუდობდა, რომ ხის შეძენით ბიძინა ივანიშვილი იყო დაინტერესებული, სწორედ ამიტომ აუქციონში მონაწილეობა „დმანისის გადარჩენის ფონდმაც“ გადაწყვიტა. ოპოზიციაში აცხადებენ, მათი ქმედება „ხალხი ბიძინა ივანიშვილის წინააღმდეგ“ კამპანიის ნაწილია და მიზნად ისახავს, რომ წინ აღუდგეს ივანიშვილის მიერ მთელი ქვეყნის ქონების და ბუნების მითვისებას.