"ჩავერთვებით ყველა აუქციონში, სადაც ივანიშვილის ინტერესებს დავინახავთ, ვაიძულებთ დაემორჩილოს იმ წესებს, რასაც ხალხი ადგენს"- ვაშაძე

პოლიტიკა - 17:24, 27 Mar, 2018

1373

27 მეტრიანი ხის აუქციონში „დმანისის გადარჩენის ფონდი“ მონაწილეობს, რომელიც ოპოზიციური პარტიებმა ცოტა ხნის წინ დააფუძნეს. როგორც ოპოზიციაში აცხადებენ, მათი ქმედება „ხალხი ბიძინა ივანიშვილის წინააღმდეგ“ კამპანიის ნაწილია და მიზნად ისახავს, რომ წინ აღუდგეს ივანიშვილის მიერ მთელი ქვეყნის ქონების და ბუნების მითვისებას.

„ახალი საქართველოს“ ლიდერი გიორგი ვაშაძე პირობას დებს, რომ ფონდი ჩაერთვება ყველა აუქციონში, ყველა საჯარო პროცესში ივანიშვილთან დაკავშირებული პირების ინტერესებს დაინახავენ. ვაშაძის თქმით, ისინი აიძულებენ ხელისუფლებას, რომ დაემორჩილოს იმ წესებს რასაც ხალხი ადგენს:

„ჩვენ ამ კამპანიას დავარქვით ხალხი ბიძინა ივანიშვილის წინააღმდეგ, ჩვენ უნდა შევაჩეროთ ის მავნებლური კამპანია, რომელიც ემსახურება იმას, რომ ყველაფერი ეკუთვნის ერთ კონკრეტულ ადამიანს, ის რომ სახელმწიფო მისი პეროსონალური ინტერესებისთვის მუშაობს - ეს ეპოქა ამ ქვეყანაში უდნა დამთავრდეს და დაიწყოს ნორმალური განვითარება.

შესაბამისად, ამიერიდან ყველა აუქციონში, ყველა საჯარო პროცესში სადაც დავინახავთ ივანიშვილთან დაკავშირებული პირების ინტერესებს, ყველგან ჩავერთვებით აბსოლუტურად.

ყველამ კარგად ვიცით, რომ გადარგვის მიზნით ამ ქვეყანაში ხე მხოლოდ ივანიშვილს შეიძლება უნდოდეს, ხის ფასად გამოცხადებულია 7 ათასი ლარი, მე ვაცხადებ, რომ თუ აუქციონში არავინ შემოვა 7 ათასის გადამხდელი ვარ დღესვე, იმისთვის, რომ ხე ავიღოთ ჩვენ და მოვითხოვთ დარჩეს ადგილზე, დარეგისტრირდეს როგორც ჩვენი საკუთრება.

ყველაზე მნიშვნელოვანია, რომ ის არასწორი პროცესი, რომელიც ქვეყანაში მიდის უნდა დამთავრდეს. ჩვენ ვიწყებთ არაძალადობრივი მეთოდით მოძრაობას. ვაიძულებთ ხელისუფლებას დაემორჩილოს იმ წესებს რასაც ხალხი ადგენს. ხალხის ერთიან ძალას ვერავინ მოერევა.“- განაცხადა ვაშაძემ.

შეგახსენებთ, ფინანსთა სამინისტროს მომსახურების სააგენტოსთან „დმანისის გადარჩენის ფონდში“ შემავალი ოპოზიციიური პარტიის წარმომადგენლები არიან შეკრებილი, ისინი ბათუმში მდებარე ევკალიპტის ხეზე გამოცხადებული აუქციონის შედეგებს ელოდებიან.

აუქციონი დღეს 17 მარტის 18:00 საათზე სრულდება.